Brighton hnehtu Cardiff tan beiseina thar
Premier League tla tur zawnna inkhelah Cardiff City chuan an elpui Brighton & Hove Albion chu 2-0 in an hneh a, Welsh club hian relegate tawh Fulham leh Huddersfield Town te hnung zui mai an tum lo.
Falmer Stadium-ah mikhual Cardiff tan Nathaniel Mendez-Laing leh Sean Morrison ten goal an khung a, an chung chiaha awm Brighton an phak lohna chu point hnih chauh niin match khat leka lehthal thei dinhmunah an ding.
Relegation Battle
Brighton & Hove Albion hian Cardiff aiin match khatin khel tlem mah se tun hnaia an khelh dan thlirin an dinhmun a him lo hle. Cardiff an hmachhawn hma hian Bournemouth lakah 5-0 ngawtin an tlawm a, match hnuhnung paliah an chak lo vek bawk.
Brighton manager Chris Hughton chuan, "Inkhel khan kan nihna a pholang. Ball kan chang tam a, goal kan khung loh avangin pressure kan ngah phah ta a ni. Kan muala ṭum hnih kan chak loh kan tuar a, duhthlan tur dang kan nei tawh lo. Kan kuta awm hi kan hum tur a ni," tiin tla thei dihmunah an ding tih a hrechiang hle.
Cardiff City erawh referee thutlukna vanga ṭum hnih an vanduai hnuah hnehna an chang a, kum 70 mi manager Neil Warnock pawh a nui leh thei ta. Warnock chuan, "Engtik nge kan chak loh ṭum pawh kha ka hre tawh lo. Hnehna kan chan avangin kan hlim em em a, tunah hian pressure kan nei lo. Chutihrualin kan tum ram thleng turin hmabak a la thui hle," tiin an hun tawn a sawi thiam hle, a nihna takah chuan Welsh club hi Brighton an hneh hma match hnuhnung pathumah an chak lo.
Cardiff beiseina
Cardiff City-in Premier League-a inham tang turin beiseina thar an nei a, kartawp hian league hmahruaitu Liverpool an mikhual nghal dawn.
Club chief executive Ken Choo chuan, "Result duhthusam a ni. Brighton kan hmachhawn ṭuma min ṭawiawmtu mi 1,771 chungah lawmthu kan sawi. Liverpool kan mikhual hunah mi 30,000 chuangin Cardiff Stadium-ah min ṭawiawm bawk ang. Kan kal zel dawn," tiin champion tum Liverpool lakah point hlawhchhuah ngei an tum a, relegation battle leh nomawi inchuhna sawi zawm theih a ni dawn.
Tun season-ah Fulham leh Huddersfield Town te tla hma deuh mah se pathumna erawh kan la hre lawk dawn lo niin a lang a, Cardiff City leh Brighton bakah hian 15-na Newcastle United leh 16-na Southampton te awm nuamin an la awm thei lo ang.
April 16, Thawhlehni Zan
Brighton & Hove 0 - 2 Cardiff City
CAR : Nathaniel Mendez-Laing 22'; Sean Morrison 50'
April 20, Inrinni
Manchester City 5:00 PM Tottenham Hotspur
AFC Bournemouth 7:30 PM Fulham
Huddersfield Town 7:30 PM Watford
West Ham United 7:30 PM Leicester City
Wolverhampton 7:30 PM Brighton & Hove
Newcastle United 10:00 PM Southampton
April 21, Pathianni
Everton 6:00 PM Manchester United
Arsenal 8:30 PM Crystal Palace
Cardiff City 8:30 PM Liverpool
April 22, Thawhṭanni zan
Chelsea 12:30 AM Burnley