Entu nei loin Bahrain GP tlan dawn

Tun thla tawpa tlan tur Formula 1 Bahrain Grand Prix chu fans lamin an en thei dawn lo, entu awm loa inelna an neih chhan hi coronavirus darh zel vang a ni.

Bahrain hian an rama zin lut tur an endik uluk hle a, rinhlelh kai deuh chu ni 14 chhung tal khung hran zel an ni. Tun hnaiah a bik takin Italian mi ten ram danga kal an harsat phah hle. F1 thuneitu lam chuan an driver emaw an team zingah ram danga luh phalsak loh an awm a nih chuan inelna an neih theih loh tur thu an sawi tawh a, Bahrain thuneitu lam chuan intlansiak thlen loh ai chuan fans awm loa tlan an thlang ta zawk.

Car intlansiakna sang ber F1 hi March 15 hian a hmasa ber atan Australian Grand Prix tlan a ni dawn, Bahrain GP hi March 22-a neih tur a ni thung. April thla laihawla neih tur Chinese Grand Prix chu hri leng vangin a hun sawn hlat a lo ni tawh.