Liverpool tan phuba lak hun a inher chhuak e!

Champions League 2018 final kha Liverpool fan-te chuan tun thlengin an la theihnghilh thei lo - Real Madrid captain Sergio Ramos-a'n Reds thiampuipa Mohamed Salah a hliam a, 3-1 in Real an chak zui.

Liverpool fans tam takin Ramos-a chet dan hi 'professional lo' tiin an sawisel a, tum reng vangah an ngai hial - kum 2021 a her chhuak a, Champions League-ah team pahnih an intawng leh dawn ta. Tun ṭuma team pahnih intawnna tur erawh quarterfinal a ni a, Real khelmualah zanin dar 12:30 hian first leg khelh a ni dawn - Liverpool-in Kiev khawpuia thil thleng kha an la theihnghilh lo a, zaninah phuba lak an duh.

Real Madrid hian an stadium hming-thang Santiago Bernabeu chu an sa ṭha mek a, hei vang hian tun season-a home match khelh nana an hman Estadio Alfredo Di Stefano-ah Liverpool hi an mikhual ang.

Hmanah chuan...

Kiev khawpuia team pahnih an intawn dawn khan Real Madrid chu rin hlawh zawk an ni a, a awm lo hran lo - Cristiano Ronaldo an la kawl a, bench-ah game thlak danglam thei Gareth Bale-a awm bawk.

Tunah erawh thawnthu a danglam tawh - Real-in Ronaldo an nei tawh lo a, Bale-a'n loan-in Tottenham Hotspur tan a khel a, Luka Modric kum pawh a tam ve ta. Kum 2018-a Madrid an ngam loh hnuah Liverpool-in Champions League, Premier League, UEFA Super Cup leh Club World Cup nomawi an chawi tawh a, Kiev khawpuia 'team indinthar mek' kha team puitling an ni tawh.

Real erawh La Liga leh Spanish Super Cup-ah nomawi an chawi hram a, tluk leh din fawm chungin an hun an hmang - rin hlawh zawk ni chungin Liverpool-in Madrid khawpui an pan ang.

Ramos tel lohna

Real-in hliam vangin captain Ramos an chhawr thei dawn lo a, Spanish defender tel lo chuan Real tlarhnung a nghing dawn tih a chiang sa.

Liverpool-in tlarhmaah Sadio Mane, Salah, Roberto Firmino leh Diogo Jota hman tur an neih avangin Real tlarhnung a ngaihtuahawm dawn tih a chiang. Reds hian Real an hmachhawn tur inbuatsaih nan an league match hnuhnung berah Arsenal chu 3-0 in an sawp bawk a, Ramos tel lohna Real tlarhnung an zuam ang.

Spanish champion manganna belhchhah turin Dani Carvajal leh Federico Valverde-te an inlan theih aiin inlan loh a rinawm zawk a, Real-in an ṭhat dan berin Liverpool an mikhual thei dawn lo.

Mahse...

Real tlarhnung leh Liverpool tlarhma enkawp chuan, "Reds hian goal engzah nge an khung ang?" tia zawhna neih mai a awl a, chutihrual chuan Liverpool tlarhnung hi theihnghilh a thiang bik lo.

Virgil van Dijk, Joe Gomez leh Joel Matip inhliam vangin tlarhnung laiah tawnhriat nei tlem pahnih Nathaniel Phillips leh Ozan Kabak an inkawp a ngai dawn a, Real striker Karim Benzema tan a phurawm khawp ang.

Kum 33 ni tawh mah se Benzema hi Spanish club tan goal khung khawl a la ni reng a, tun season inelna hrang hrangah match 33 khelin goal 24-a khung tawh a, assist vawi ruk a nei.

Chutihrual chuan Benzema hian tlar-hmaah thlawptu a nei ṭha tawk lo. Hei hi hriain Real boss Zizou pawhin a formation duh ber 4-3-3 chu a duh angin a hmang thei lo a, 3-5-2 leh 3-4-3 nen a thlak kual - Real squad-a Benzema dawta goal khung hnem chu Casemiro niin goal ruk a khung.

Arnold mawlh hi...

England coach Gareth Southgate-a'n international break-a a koh loh avangin Liverpool right back Trent Alexander-Arnold-a chanchinin ngaihven a hlawh a, Arsenal lakah Liverpool fachuam hian a theihna pholang zuiin hmuhnawm khawpin a khel.

Zaninah pawh Arnold leh Andy Robertson-a khelh ṭhat leh ṭhat loh hian tlarhma lama Liverpool goal nawr nat leh nat loh thui takin a hril dawn a, an fimkhur erawh a ngai dawn. European football-a full back hmuhnawm pahnih tan tlan chhuak tam turin tlarhnunga tawnhriat nei tlem Phillips leh Kabak rin ngam a ṭul dawn a, chetsual zeuha hrem theitu Benzema a awm avangin a awlsam lo ang.

He thu buatsaih a nih lai hian Real tana Eden Hazard inlan theih dawn leh dawn loh a la chiang lo a, Chelsea forward hlui hi a inlan thei a nih chuan Real an ṭha sawt ang.

Midfield

Zanina team pahnih inhmachhawn tur hi midfield-a hmuhnawm dawn - Real-in Casemiro, Toni Kroos leh Modric an inkawptir leh ngei a rinawm a, an chhe lo.

Liverpool fan-ten tun hnaiah an hmuh châk em em Fabinho leh Thiago Alcântara inkawp an hmu ṭan a, mit ti tlai an tling - player pahnih dinpui turin Georginio Wijnaldum-a la awm bawk a, midfield-a team pahnih in do tur hi en châkawm chu a ni. Premier League champion Reds-in league nomawi an hum thei lo tih a chiang tawh a, nomawi an beiseina awmchhun chu Champions League chiah a ni ta - zaninah chak phawt an mamawh.

Los Blancos (Real sawina) tan thawnthu a danglam tam lo - La Liga-ah beisei la nei mah se an elpui Atletico Madrid leh Barcelona an ni a, a harsa dawn. An 'special' na Champions League hi Real tan a awlsam zawk mai thei a, season tawpa chhuak tur anga sawi Zidane-a tan a hmingchhe lutuk tur thai bo nan European champion nih a pawimawh.