Martial-a season a tawp?

France tana a fehchhuahna lama inhliam Anthony Martial chu tun season-ah Manchester United tana a inlan a beiseiawm tawh loh.

United boss Ole Gunnar Solskjaer chuan, "Tun season chhung Martial chhawr thei lo dinhmuna kan ding ta mai hi pawi kan ti takzet a ni. France lamin a inhliam na lo tiin sawi mah se a inliam hi a na hle. Season tawp hmaa a rawn let leh theih chuan thu lawmawm a ni ang a, chu pawh chu beisei ngam a har hle," tiin Martial-a chungchang a sawi.

Kum 25 mi Martial hi France-in Ukraine leh Kazakhstan an hmachhawn ṭumin a inlan a, Kazakhstan nen hian a khupah hliam a tawrh avangin minute 59-naah Kylian Mbappe-a'n a thlak. Martial hian tun season-ah goal sarih a khung tawh a, kumin bikah match 19 inlanin goal thum chiah a khung. French forward hi goal hmaah hriam tawk lo mah se Edinson Cavani a chet ṭhat bik loh avangin United hian an mamawhna a sang hle.

United hian defender Eric Bailly chu an ram Ivory Coast tana a fehchhuahnaah Covid-19 a kai avangin an chhawr thei lo bawk.