Man City hmaah Haaland

Manchester City leh tunlai striker ṭha ber zinga mi Erling Haaland te sawi zawm an ni a, Norwegian striker hi Eithad Stadium pan tura sawi a awm.

Transfer boruak ti ngaihnawmtu Haaland hian zanin dar 12:30 hian Etihad Stadium a tlawh dawn a, amaherawhchu zaninah erawh Man City kawr ha loin hmachhawn tur zawkin a ni ang.

Champions League quarterfinal-ah Manchester City leh Borussia Dortmund te an inhmachhawn dawn a, football ngainatute tan hlah phal chi a ni lo ang.

City fapa Haaland?

Erling Haaland hian tun season-ah goal 33 a khung leh der tawh a, agent atan Mino Raiola a hman bawk avangin transfer-ah thawm a nei ring hle.

Raiola leh Haaland-a pa Alf-Inge ten Real Madrid leh Barcelona te an tlawh a, Norwegian striker aṭangin sum ṭhahnem tak lakluh an tum. Thuthang awm dan chuan Raiola leh Haaland-a pa te hian euro maktaduai 20 ve ve an beisei a, hemi a nih avang hian lakchhuah a har phah sawt ang.

Chutihrualin Man City vanneih theihna erawh Alf-Inge hi an player hlui a ni a, a fapa thlemluh a awlsam sawt maithei. Haaland-a pa hi Manchester United captain hlui Roy Keane-a'n Man City tana a khelh laiin a khupah a tlawh hliam lui a, hemi a nih avang hian hriat a hlawh hle.

Alf-Inge hi Man City player hlui a nih avangin Haaland hi Man City fapa tihin a sawi theih a, amaherawhchu lalut tura sum sen tam a ngaih dawn avangin lakluh a awlsam lo ang.

En bik tur Haaland

Man City-in season tawp rualin club legend Sergio Aguero an chhuah zalen dawn a, Argentine striker thlakna tura an hual ruk Haaland hian en bik a hlawh dawn. English club hian match hnuhnung paliah goal an chhuah lo a, Pep Guardiola-a'n goal nawr chauh ngaihtuah lo a, goal venhim a ngaih pawimawh tel avangin Haaland tan hna a harsa dawn.

Man City aṭanga Dortmund zawmtu Jadon Sancho inliam vanga a inlan a beiseiawm loh avangin Haaland tan a harsat belhchhah ang. Chutihrualin Haaland thlawp tur hian English rawlthar Jude Bellingham bakah Marco Reus leh Thorgan Hazard te an awm dawn a, theihna nei sang player kawl tam Dortmund khel a hmuhnawm ang.

City nge nge

Chutihrualin team pahnih dinhmun dik tak thlir erawh chuan Dortmund tan Man City hi an 'u' deuh. Pep Guardiola hote hi UCL bakah nomawi pathum dang Premier League, FA Cup leh League Cup-ah an la champion vek thei a, an khelh dan thlirin vanneih vanga tun dinhmun thleng hi an lo tih a chiang bawk.

Amaherawhchu Man City buaina erawh Champions League-ah an ṭangulh leh ṭhin. Spanish manager Guardiola hian Barcelona a chhuahsan hnuah Europe-ah a la champion leh lo a, Champions League nomawi an duh luatah an chesual leh ṭhin.

Guardiola hian UCL mangchhia mangṭha a tum dawn a, 'away goal rule' pawimawhzia a hriat chian tawh avangin an mualah goal venhim a ngai pawimawh lehzual ang. Chutihrualin second leg an khelh huna hna a awlsam zawk nan Etihad Stadium-ah goal khung ngei a tum dawn a, hei tak hi hmuhnawm tur chu a ni.