Mourinho-a'n a naute a mawhpuh

"Coach pangngai, player dang," tih chu Jose Mourinho-a'n Tottenham Hotspur leh Newcastle United inkhelh zawh hnua a ṭawngkam hman a ni a, Potuguese manager hian an chak zawk loh chhanah a naute a mawhpuh.

Pathianni zan inkhelah Spurs hian hun tawp dawnah goal an chhuah avangin 2-2 in an inhnehtawk a, Premier League table-a palina nih theihna remchang an bawhpelh - goal an chhuah danah Mourinho a lawm lo hle.

St. James' Park-a inkhelah mualneitu lamin Joelinton hmangin goal hmahruai an khung, mikhual team-in Harry Kane goal hnih hmanga chhang letin chawlhlawk laiin Mourinho naute an chungnung zawk.

Goal ven thiam tia hriat hlawh Mourinho nauten hun tawp hma minute nga chauh awm tawhah goal an chhuah. Loan hmanga an hawh lai Arsenal midfielder Joe Willock chuan Magpies tan khungin point khat an hlawh.

Mourinho-a'n Stamford Bridge-ah hun a hman hmasak season thum chhung khan, chak thei dinhmuna an din hnuah vawi 14 chauh an tlawm. Manchester United-ah khan season hnih chhungin vawi 18 chauh an tlawm bawk.

Spurs manager Mourinho chuan, "Goal hnuhnung kan chhuah dan kha en ila, an cross hnuah ball an chang leh a, chumi hnuah kan defender pahnih hma aṭangin a lut. Dan theihna hun ṭha vawi thum ngawtah kan dang lo tihna a ni.

"Kan thawkrim em em a, mahse a chang chuan tihsual pawh ni lem lo, player-te theihna in a tlin chin hi a awm ṭhin," tiin a naute chu Blues leh United a enkawl lai anga 'class' nia a hriat loh thu a sawi hmiah - Spurs player tan hriat nuam a ni lo ang.

Season tir lam khan Tottenham hian minute 97-naah goal an chhuah avangin Newcastle nen hian an lo inhnehtawk tawh bawk a, tunah an elpui Chelsea chetsual vanga tlan pelhna hun ṭha an neih chu hun tawp dawna goal chhuah vangin an bawhpelh leh a ni.

Spurs hian EPL season kal laia striker 'hot' bera sawi ngam Kane an nei. English striker hian goal 19 khung leh tawhin ani aia khung hnem an awm lo. Hmatawng nei ṭha mah se an tlarhnung a phui tawk lo a, a sang pali zinga tel phak a awlsam dawn lo.

Mourinho naute hi Europa League aṭangin an tla tawh a, League Cup final khelh hmabak an la neihah Manchester City nen an intawng ang. Nomawi an chawi lo a, season tharah UCL an khel lo bawk a nih chuan Kane hma hun thlengin a nghawng a rinawm.