Valencia-in khelmual an chhuahsan

Pathianni zan La Liga inkhelah Valencia chuan 2-1 in Cadiz an ngam lo a, he inkhelah hian vun rawng inhmuhsitna ṭawngkam avangin Valencia player-te chuan khelmual an chhuahsan.

Valencia defender Mouctar Diakhaby chu Cadiz centre back Juan Cala nen minute 29-na velah an intibuai a, Diakhaby chuan Spanish defender hian vun rawng inhmuhsitna lam hawiin a ṭawng khum niin a sawi.

Minute thum hnuah Diakhaby lam an ṭang tih lantir nan Valencia player-te chuan khelmual an chhuahsan a, minute 15 bawr vel chawlh a ngaih hnuah Valencia player-te hian khelmual lut lehin an inkhel zo a ni.

Valencia defender Jose Gaya chuan, "Kan inkhelh chhunzawm loh chuan point thum kan hloh tur thu leh a aia tam pawh paihsak kan nih theih thu mi an hrilh.

"Diakhaby chuan inkhelh chhunzawm turin min hrilh hlawm a, amah ber khan inkhel chhunzawm turin minti lo se chu khelmual kan lut leh kher lo ang," a ti a, Diakhaby erawh inkhel chhunzawm thei a nih loh avangin thlak a nih thu a sawi.

Inkhel tihtawp a nih lailawk lai hian team pahnih hi 1-1 in an inhnehtawk a, Diakhaby ṭawng khumtu Cala hian goal hmahruai khungin Kevin Gameiro chuan Valencia tan a sut.

Second half minute 88-naah Marcos Mauro chuan a khung ve leh a, 2-1 in Cadiz an chak - kum 31 mi Cala pawh hi second half-ah chuan a inlan tawh lo.

Valencia defender Gaya chuan, "Cala ṭawngkam kha sawi chhawn tlak lo khawpa mawi lo a ni," tiin Diakhaby-a ṭawngkhum dan a sawi a, Valencia chuan, "Mouctar Diakhaby lam kan ṭang tlat a ni.

"Team chuan inbiakrawnna kan neih hnuah inkhelh chhunzawm kha kan club zahawmna humhim nan kan tih turah kan ngai a, hetihrual hian chi leh chi inthliarna lam hawi thil reng reng chu kan do tlat a ni," tiin twitter lamah an ziak ve bawk.