Pakistan tan Fakhar-a run 193 a tawk lo

Pakistan opener Fakhar Zaman-a'n run 193 zet siam mah se South Africa nen ODI match hnihna an khelhnaah an chak zo lo a, Proteas hi run 17 a chakin series-ah 1-1 in an inhnehtawk chiah.

Johannesburg-a inkhelah hian ṭhum-vawrah Pakistan an vannei a, vawm hmasak an thlang. South Africa an che ṭha rual a; Temba Bavuma (92), Quinton de Kock (80), Rassie van der Dussen (60) leh David Miller (50) te chet ṭhat zarah Proteas-in run 341/6 an siam.

Pakistan bat hun a thleng a, Fakhar Zaman-a'n ball 155 lekah run 193 a siam. Amaherawhchu Fakhar hian thlawptu a nei ṭha tawk lo a, over 50-ah run 324/9 chauh an siam avangin South Africa chu run 17-in an chak.