Europe khelh inbeisei Stuttgart

Pathianni zan Bundesliga inkhelah VFB Stuttgart-in an mualah Werder Bremen 1-0 in an hneh a, goal awmchhun hi minute 81-naah Bremen player Ludwig Augustinsson-a'n a lama a tihluh a ni. Inkhel dangah Union Berlin leh Hertha Berlin te 1-1 in an inhnehtawk.

Stuttgart hian point 39 hmuin table-ah pariatnaah an awm a, pangana Borussia Dortmund chu point li chiahin an pha lo. Kum 23 mi Sasa Kalajdzic chuan, "Europe khelh dan kawng kan la zawng a ni," tiin season thara Europa League khelh an la inbeisei thu a sawi.

Austrian forward Kalajdzic hian tun season Bundesliga-ah goal 13 a khung tawh a, amah aia khung tam chu Robert Lewandowski (35), Andre Silva (22), Erling Haaland (21), Wout Weghorst (17) leh Andrej Kramaric (14) te an ni.