Atletico an tlawm; La Liga a 'hot' zel
La Liga hmahruaitu Atletico Madrid chuan Pathianni zan khan 1-0 in Sevilla an ngam lo a, La Liga nomawi chuh inum boruak a san belh zel.
Sevilla tan defender Marcos Acuna chuan inkhela goal awmchhun a khung a, mikhual team Atletico Madrid-in a chhanletna tur an neih loh avangin an tlawm.
Atletico an tlawm avangin an hnuai chiaha awm Real Madrid nena an inthlauhna chu point thum chiah a ni ta a, nizana inkhel Barcelona-in hnehna an chan chuan point khat chiahin an sang fal tawh ang.
Barcelona hian nizan khan Real Valla-dolid an hmachhawn a, he thu buatsaih a nih lai hian result kan hre hman lo.
Atletico an vannei?
Diego Simeone-a nauten hnehna an chang zo lo a, hetichung hian an 'vannei' tih a ngai tlat - Madrid khaw club hian minute riatnaah penalty an chawi nghal.
Saul Niguez chuan Sevilla midfielder Ivan Rakitic-a tih tluk avangin penalty hi a chawi a, a pet turin Lucas Ocampos-a lo pen chhuak.
Mahse, Atletico goalkeeper ṭha mi Jan Oblak chuan Argentine winger Ocampos-a penalty pet chu a dansak a, Atletico an him hram.
Minute 70-naah erawh Atletico an vannei seng tawh lo - Manchester City winger hlui Jesus Navas chuan ven loha awm Acuna tan ball a thlawh lut a, Argentine defender tan tauh luh lohna chi a ni lo.
Atletico an thamral?
Madrid khaw club-in an vanduaina lai an thlir duh a nih chuan thlir tur a awm nual - Mario Hermoso chuan si phurh sutna remchang nei mah se yard 15 vel leka hla aṭangin a thlawh 'over'.
Bench aṭanga luhtir Angel Correa chuan hun pek belhah a team tan point khat hlawhchhuahna remchang nei mah se Sevilla keeper Yassine Bounou chuan a dansak a, kut ruakin Atletico an haw.
Mahse, statistic aṭanga thlir chuan hnehna chang Sevilla-in chak an phu zawk a, 57% ball chang chungin vawi 18 shot an nei a, heng zinga panga chu target-ah a kal.
Atletico hian vawi kua chiah shot an nei ve a, heng zinga pali hi target zawnah a kal thei - Copa del Rey leh Champions League aṭanga tla tawh Atletico hi an beisei awmchhun La Liga title pawh la lo thei dinhmunah an ding ta.
A tawp thleng
Kum 2014 hnua league nomawi chawi tum Atletico-in match kua khelh tur an la nei a, an elpui Barcelona chu an la hmachhawn tur zingah an tel avangin an dinhmun a ṭha bik ta lo hle.
Mahse, Atletico Madrid manager Diego Simeone chuan, "La Liga hi a harsa em em a, mahse, a tawp thlengin kan bei dawn a ni," a ti a, nomawi beiseina tlawmsan thei an la nih loh thu a sawi.
Atletico Madrid tan lawmna tur pakhat a awm - April 10 zanah Real Madrid leh Barcelona an inkhel dawn a, an elpui team pahnih zinga pakhat talin point an la hloh dawn tihna a ni.
A êng zawnga thlir chuan Barcelona an la hmachhawn tur pawh hi an elpui team point chhuhsakna remchang a ni a, Atletico tan beisei tur a la awm e.
Sevilla beiseina
Real Madrid boss hlui Julen Lopetegui kaihhruaina hnuaiah Sevilla tan beisei tur a la awm chhunzawm zel a, he team hian top four chauh ni loin champion pawh beisei ngam tur an ni.
La Liga table-ah Sevilla hian palina dinhmun an luah mek a, hmahruaitu Atletico Madrid hi match kua khelh tur la awmah point riat chauhin an thlau tawh.
Sevilla hian Champions League chu an khel dawn chiang tawh anga sawi theih a ni a, table-ah palina dinhmun hauh mekin anmahni hnaih bertu Real Betis aia an sanna chu point 12-a ni.
Lopetegui-a team hian champion tum zinga mi Real Madrid an la hmachhawn dawn bawk a, Spanish coach hian champion a suangtuah ngam a nih pawhin dem theih a ni lo.