Greenwood-a'n Man United a chakpui

Manchester United-in Pathianni zan khan Brighton & Hove Albion an mikhual a, 2-1 in hnehna an chang. Old Trafford-a inkhelah Danny Welbeck-a'n a club hlui lamah Seagulls tan goal hmahruai a khung a, Man United-in second half-ah Marcus Rashford leh Mason Greenwood te goal hmangin an lehthal.

Kartawp Premier League inkhelah Leicester City leh Chelsea an chak lo a, point thum hmangin Man United-in pahnihna dinhmun an sawhnghet. Ole Gunnar Solskjaer-a hote hian point 60 an hmu a, pangana Tottenham aia point 11-a an hmuh tam zawk avangin season thara Champions League khelh a beiseiawm hle.

Welbeck a rawn kir
Manchester United tana Premier League nomawi chawi tawh Danny Welbeck-a'n Brighton kawr hain Old Trafford-ah a inlan a, Man United tlarhnung tan a hnawksak hle.

Minute 13-na lekah Welbeck hian ṭha zetin goal-ah a tauh a, United keeper Dean Henderson-a'n dang hman mah se a per chu Welbeck bawk hian tauh lehnghalin Henderson tan dan ngaihna a awm tawh lo.

Man United leh Arsenal forward hlui Welbeck hi second half-ah pawh a la hnawksak a, 1-1 a nih laiin Harry Maguire-a'n box chhungah a ti tlu a. Amaherawhchu VAR hmanga en let hnuah referee-in penalty turah a ngai lo.

A hming chu Greenwood
Solskjaer-a'n bul ṭantu zingah United academy chhuak Rashford leh Greenwood te a telh a, kum 19 mi Greenwood hi inkhelh ṭantirh aṭangin a hmuhnawm.

Minute 10-na lekah Greenwood-a'n goal ban a pet per nghal a, amaherawhchu Brighton-in goal an khung hmasak avangin United an talbuai. Second half-ah mualneitu goal bawh a na leh hret a, minute 52-naah Fernandes-a ball pek chu Rashford-a'n cool takin goal-ah a chantir.

Goal dang a luh lawk loh avangin Solskjaer-a'n Edinson Cavani leh Rashford aiah Donny van de Beek leh Daniel James te a luhtir. Minute 83-naah United-in chakna goal an khung a, player theihna sang danglamna a lan rualin vanneih a tel bawk.

Fernandes-a'n box chhungah rilru fim a nei tih lantirin fing takin Paul Pogba tan a vawrh a, French midfielder hian volley fuh tawk lo mah se Greenwood-a'n rang taka tauhin chakna goal a khung.

United boss Solskjaer chuan, "Tunlai football chu statistics aṭangin an teh nasa lutuk a, Greenwood hi chu goal a khung theih piah lamah team tan a ṭangkai. Tun hnai thla hnih thum chhung chu ṭha takin a khel tawh a, a zir belh zel chuan goal khung thei ber zinga mi a ni ang," tiin a fak.

Kum 19 mi Greenwood hian season liam ta khan league-ah goal 10 a khung a, tun season-ah erawh league-ah goal hnih chiah a la khung.

United no. 1 Henderson?
Manchester United inkhel chanchin ai maha an sawi nasat chu goalkeeper chungchang a ni a, Solskjaer-a'n David de Gea aiah Henderson a thlang. March thla khan Henderson hi a zawnin match rukah a inlan a, De Gea-a'n a fa hmasa ber a neih dawn avangin thilmak a ni lo.

Tun ṭumah erawh keeper pahnih an dam ṭha ve ve a, Henderson thlan a ni zawk. Solskjaer chuan, "Keeper ṭha bik ve ve an ni a, an pahnihin no. 1 ve ve an ni. De Gea hi thla khat chhung a chawlh avangin a awl a, a la inlan leh dawn," tiin a sawi.

Man United player zinga hlawh tam ber De Gea hi kum 30 mi chauh a ni a, amaherawhchu a chetsual zin deuh avangin club chauh ni loin an ram Spain-ah pawh bul a ṭan pha lo. Tun hnai international match pathumah Luis Enrique-a'n De Gea aiin Athletic Bilbao keeper Unai Simon a thlang vek.

Engtin zel?
Manchester United-in April 8, Ningani zan dar 12:30-ah Granada nen Europa League quarterfinal an khel dawn. Solksjaer hnuaiah Man United-in nomawi an la chawi loh avangin tun season-a nomawi an chawi theihna awmchhun Europa League hi an ngai pawimawh ang.

Solskjaer-a hote hi April 11, Pathianni zan dar 9:00-ah Tottenham Hotspur hmachhawn turin London-ah an zin dawn. Nikum October 4 khan Spurs hian United hi Old Trafford-ah 6-1 in an sawp a, tun ṭum an inkhel tur hian ngaihven a hlawh sawt ang.