Miami Open champion Hurkacz

Hubert Hurkacz chuan tennis a khelh hun chhunga a nomawi chawi hlu ber a hlawh chhuak. Poland tlangval hian nimin zing khan Jannik Sinner hnehin Miami Open-ah a champion - ATP Masters 1000 title a lakna hmasa ber a ni.

Kum 24 mi Hurkacz hian darkar khat leh minute 43 chhungin Sinner hi 7-6 (7-4), 6-4 in a hneh a, mimal record a siam bakah hian Polish singles player zingah ATP inelna liana champion thei hmasa a ni nghal bawk.

Miami Open-ah hian player langsar an inlan mang lo - ranking sang zual paruk zinga pali ngawt an inhnukdawk. Champion Hurkacz hi world number 37 a ni a, Tomas Berdych (2005) hnu lamah Masters title la thei ranking hniam ber a ni.

Hurkacz chuan, "Tennis ka khelh hun chhung zawnga ka chet fuh leh khelh ṭhat ber ṭum chu ka tawng, tournament kan khelh chhung zawng khan inrintawkna sang tak nen ka khel thei," a ti a, a tawn chinah a lawm thu a sawi bawk.

Final kalkawngah hian Stefanos Tsitsipas leh Andrey Rublev te a hneh a, rawlthar Sinner nen nomawi an inchuh hma pawhin champion phu khawpin a khel chhuak tawh a ni.