Quartararo a tlan chak ber

Fabio Quartararo-a'n Doha Grand Prix-ah hnehna a chang a, rider championship lamah pahnihna dinhmun a luah chho. A hnungah hian Johann Zarco leh Jorge Martin te an thleng ve thung.

Hliam vangin Marc Mrquez a la inlan thei lo a, legend Valentino Rossi pawhin beisei a phak lo - Italian rider hian 16-na dinhmun a luah phak hram, a kum a tam deuh tawh vangin atan MotoGP a hautak deuh ta niin a ngaih theih.

Qualifying lamah Rossi hi a tlan chhe hle, 21-na aṭangin bul a ṭan a ngai hial. MotoGP vawi sarih champion tawh hian qualifier a tlan tawh china a tih chhiat ber ṭum a tawn miau avangin inelna takah pawh thawhchhuah a harsa.

Quartararo a chak
March 28 khan Losail Inter-national Circuit, Lusail tlankawngah MotoGP season ṭan a ni a, tlan kawng ngaiah bawk hian Pathianni zan khan inelna neih nawn leh niin, an tlan hmasaka pakhatna Maverick Vinales chu panganaah a thleng.

Rider an in um tawk viau a, lap tlan hmabak panga chauh an neih tawhah Quartararo hian a hmasa ber aṭanga tlan ṭan Martin leh Zarco te tlan pelin pahnihna dinhmun a luah. Ducati rider Zarco hian pahnihna dinhmun luah turin lap hnuhnung berah a teammate a tlan pel.

Kum 1954 khan French rider pahnih Pierre Monneret leh Jacques Collot te chuan bike intlansiakna sang berah a rualin dawhsan (podium) an lo lawn tawh, a hnu lamah French tlangval pahnih Quartararo leh Zarco te hi podium lawn rual leh thei hmasa an ni.

Season kal laiah inelna vawi hnih an nei tawh a, point 40 neitu leh Ducati bike khalhtu ni bawk Zarco-a'n hma a hruai. April 18, Pathianni hian intlansiak pathumna an nei lehnghal dawn; Algarve International Circuit, Portimao-ah Portuguese Grand Prix an tlan ang.

Inrintawkna
Pakuana aṭangin tlan ṭan chauh mah se Quartararo-a'n hnehna a chang thei a, season a hman danah a lungawi rih hle. Quartararo chuan, "Tlan chhinna kan neih lai khan thil a awlsam lo hle, a bik takin kawng ngilah Ducati an tlan chak avangin a harsa dawn tih a lang.

"Mahse, inelna tak kan hmachhawn meuh chuan kan team ṭhat tawkna a takin a lang. Qatar hi chu tun hma aṭangin Yamaha tan hmun duhawm a ni tawh ṭhin, kuminah pawh dinhmun ṭha tak kan luah thei hi a lawmawm," a ti a, inrintawkna an neih san thu a sawi lang bawk.

Season hmasa khan hri leng vanga buaina hrang hrang a chhuah karah Suzuki leh KTM te an che ṭha a, kuminah erawh Yamaha leh Ducati an chungnung rih viau. Inelna neih hmabakah eng tiangin nge Honda an rawn chet ang tih chu hriat châkawm tak a ni.

Beisei ang chuan Portuguese GP an tlan hunah Marquez a inlan thei tawh ang, Honda rider hi a dam ṭha a nih chuan team dang tana elpui hautak ber a nih ngei a rinawm. MotoGP season kal lai a ngaihnawm zel dawn tih a chiang.