Zarkawt BCA-in semifinal an lut

Mizoram Super League season 6 khelh laiah Zarkawt BCA chuan match li an khelh tawhah hnehna an chang vek a, point riat hmuin semifinal an lut chiang der tawh. An league match hnuhnung ber atan March 13, Zirtawpni zanah Chanmari Vikings an hmachhawn leh ang.

Team thar Ramhlun Sporting Club pawhin Tuikual South Basketball Club chu 77-66 in an hneh a, tualchhung basketball inelna sang berah a vawi khat nan chak ni hmel an hmu ve ta.

Champion lai BCA an kal vung, Inrinni zan inkhelah an khingpui Chawnpui BC chu 112-81 in an hneh, tun season kal laiah match khata point score hnem ber record an siam. Vikings-in Chawnpui lakah point 110 an neih tawh chu an khum.

BCA tan MSL Most Valuable Player ni lai Lalrina Renthlei a hmuhnawm, Tuikhuahtlang tlangval hian point 29, rebound 13 leh assist vawi 10 a nei a, tualchhung player zingah MSL 6-a triple double nei hmasa ber a ni.

RSC an chak

Zirtawpni zan inkhelah Ramhlun an chak avangin semifinal beiseina an nei zel, point li neiin pangana an ni a, an chunga awm Tuikual leh a hniam bera awm Chawnpui te nen point li vek an hmu - Chawnpui hian match khatin an khel hnem tawh thung.

Ramhlun hian Chawnpui leh Khatla TBL an la hmachhawn leh dawn, an elpui Chawnpui lakah point hnih an sual chhuak thei a nih chuan a sang pali zingah an tel a rinawm - a hniam pahnihin relegation playoff an khel dawn a ni.