Mizo pathum telna Chennaiyin tan ISL final

Chennaiyin player-te an thlenna hotel lam panin bus-ah an zai rual dual dual a, "You'll never walk alone," tih hla an sa - chu thawm bengchheng karah chuan Lallianzuala Chhangte chuan, "Engtiklai pawhin Pathian hi a ṭha a ni," tiin Vanglaini a hrilh a, an lawmna a luangliam a ni.

Inrinni zan khan Indian Super League semifinal second leg inkhelah FC Goa chuan 4-2 in Chennaiyin FC an hneh a, final thlenpui tur erawhin a tling tawk lo. Inkhel hmasa zawkah 4-1 ngawta an lo tlawm tawh avangin inkhel pahnih belhkhawmah 6-5 in an tlawm. 

Mizo tlangval Lallianzuala Chhangte chu Chennaiyin tana goal khungtu zingah a tel a, semifinal first leg-ah a lo khung tawh bawk. Jerry Lalrinzuala'n Emerging Player of the Match chawimawina a dawng a, Laldinliana Renthlei chuan inkhel bul a ṭan bawk. 

FC Goa coach Clifford Miranda chuan, "4-1 aṭanga tho leh thei an awm a nih chuan keini hi kan ni ang," tiin a sawi lawk a, India international hlui sawi ang neiin minute 21 chhungin goal hnih an rawn khung!

Chennaiyin captain Lucian Goian chuan minute 10-na lekah Jackichand Singh-a ball cross chu an lamah a tauh lut a, Mourtada Fall chuan minute 11 hnuah Brandon Fernandes-a free-kick chu a tauh lut zui. Goa an phur a, mahse minute 23-naah thil pawi a thleng zui - first leg-a an chhawr theih loh avanga a tel loh langsar Hugo Boumous a inhliam a, FC Goa goal nawr a nem sawt. 

2-0 in first half a tawp a, away goal an neih sa bawk avangin Gaurs (Goa sawina) hian goal khat lek pawh an khung belh chuan an tlang thei tih an hria - mahse minute 52-naah Lallianzuala Chhangte a rawn lang a, tun season-a a goal sarihna a rawn khung!

Chennaiyin goal khung khawl Nerijus Valskis chuan goal khat a rawn thawh ve leh a, 2-2 a ni. FC Goa tan beisei a tlem sawt - minute 80 hnuah Edu Bedia leh Fall ten goal rawn khung ve leh mah se chak turin goal hnih dang an la mamawh cheu a, an tlin ta lo - goal hnih an chhuah hman an tuar. 

Inkhel boruak 'hot' takah Goa defender Saviour Gama chu hun pek belhah a yellow card pahnihna a hmuh avangin hnawhchhuah a ni a, league-a palina Chennai club-in point hmu hnem ber FC Goa hnehin final an lut. 

Chennaiyin hian tun season-a an match hmasa paliah goal an khung miah lo a, an dinhmun a chhe takzet. Hetihlai hian John Gregory hnuaiah an khel a, match rukah vawi khat an chak!

Gregory a bang a, Owen Coyle a lo lut - Bolton Wanderers boss hlui hian match 12-ah vawi sarih a chakpui a, vawi thum draw result neiin semifinal an lut - tunah a vawi thum nan ISL final hial an lut ta. Coyle erawh a lawm a kim lo, "Kan ṭhat dan berin kan khel chhuak lo. Champion tur chuan kha aia ṭha zawka khelh kan mamawh, " tiin final a thlir lawk. Semifinal lehlama ATK leh Bengaluru inkhel result kan hre hman lo. 

Semifinal First Leg Results

Chennaiyin FC    4 - 1    FC Goa

CHE:, Lucian Goian 54'; Anirudh Thapa 61'; Eli Sabia 77'; Lallianzuala Chhangte 79'

FCG: Saviou Gama 85'

Bengaluru    1 - 0    ATK

BEN: Deshorn Brown 31'

Semifinal Second Leg Result

FC Goa    4 - 2    Chennaiyin FC

FCG: Lucian Goian 10' (OG); Mourtada Fall 21', 83'; Edu Bedia 81'

CHE: Lallianzuala Chhangte 52'; Nerijus Valskis 59'

March 08, Pathianni Zan

ATK    7:30 PM    Bengaluru FC

*Result kan hre hman lo

March 14, Inrinni Zan - Final