Premier League champion tum Liverpool Europe-ah an inhrosa

Season hmasa Champions League finalist Liverpool-in Europe-ah hnathawh zawh loh an la nei tih pholangin Porto chu 4-1 in an sawp a, nomawi chawi ngei tumin kawng dik an zawh zel.

Liverpool hian Champions League quarterfinal first leg-ah Porto hi 2-0 in an lo hneh tawh a, khualmualah hnehna an chan leh tak avangin inkhel pahnih belhkhawmah 6-1 a chakin semifinal an lut a, final luh tumin Barcelona an hmachhawn ang.

Merseyside club tan hian Sadio Mane, Mohamed Salah, Roberto Firmino leh Virgil van Dijk ten goal khat ṭheuh an khung a, Porto tana Eder Militao chhanletnain kawngro a su lo.

Pathianni zan dar 8:30-ah Liverpool hian league match an khel lehnghal dawn a, khualmualah tla thei dinhmuna ding mek Cardiff City an lenchilh dawn - inkhel a hmuhnawm ang.

Porto, lo kiang rawh le

Liverpool-in season hmasa Champions League final an luhna kawngah Porto hi last 16-ah an lo tawng tawh a, Anfield-ah goal awm loin inhnehtawk mah se khualmualah 5-0 a sawp zuiin an tlang chiang hle.

Porto-in season hmasa aia pen khata hmasawnin quarterfinal an lut a, mahse an kawng dal turin Liverpool bawk an lo ding a, Porto tan ṭawngṭai chhanna an ni lo.

Season hmasa nena tehkhin pawhin thawnthu a danglam tam lo. 5-0 a hnehna an chan ṭuma goal khungtu Mane, Salah leh Firmino te bawkin goal an khung leh a, Van Dijk hming a lang tel ta bawk.

Porto khelmuala hattrick lo siam tawhtu Mane-a'n minute 26-naah goal hmahruai a khung a, Senegalese forward goal khung hi offside-ah ngaih ni zet mah se VAR hmanga ennawn a nih hnuah pawm a ni.

Goal li

Liverpool aiin Porto goal nawr a na zawk a, goal hmaa hriam zawk erawh Reds an ni. Premier League hmahruaitu team hian second half-ah counter attack ṭha zet hmangin goal an khung a, a chhawrtu chu Salah a ni.

Porto-in an beidawn duh loh rah an seng a, season thara Real Madrid pan mai tur Eder Militao chuan an goal hnihna an chhuah aṭanga minute thumna lekah si phurh a rawn sut ṭhen.

Mahse, Porto hlim chhung a rei lo. Bench aṭanga luhtir Firmino chuan minute 77-naah hnai set sawt aṭangin a khung a, hun tawp nan minute ruk chiah a awm tawh tihin Van Dijk chuan a tauh lut bawk.

Porto coach Sergio Conceicao chuan, "Liverpool khan target-ah vawi li shot an nei a, an khung vek a ni. Chu chuan an quality san zia a pholang," tiin an ngam loh team a fak.

Barca aiah Cardiff

Liverpool-in semifinal-a an hmachhawn tur chu Barcelona an ni a, Reds hian duhthlang thei ni se Catalan club hmachhawn loh hi an duh ang. Mahse, Jurgen Klopp-a'n Barca a ngaihtuah hman rih lo.

Reds manager Klopp chuan, "Football hmuhnawm pho chhuak ṭhin Liverpool leh Barca inhmachhawn tur hi chanchin ṭha a ni a, hneh theih dan tur kan ngaihtuah ang. Mahse, chu chu zanina ka rilru tibuaitu a ni lo," a ti.

Ni e, Klopp hian rilru kaptu dang a nei a, chu chu Premier League a ni - Barca hmain Cardiff leh Huddersfield an hmachhawn leh phawt a ngai a, league match hmabak li an la neihah Cardiff hi a hlauhawm ber ang hiala chhal ngam an ni.

Cardiff hian Liverpool ang thoin league match li chiah khelh tur an nei tawh a, match khat hlutna hi team pahnih tan a inang reng - Cardiff hi vawi khat chak loha tla thei an ni a, Liverpool hi vawi khat tlawma Premier League nomawi thlauh thei an ni thung.

A tak ram beiseina

Cardiff hian an beisei a bo tawh nia a lan hnuah relegation zone lama an elpui Brighton & Hove Albion chu 2-0 in an hneh a, hei tak hian beiseina thar a siam sak a, an phur vanglai tak a ni.

Brighton an hneh zawh khan Cardiff boss Neil Warnock chuan, "Eng team pawh hmachhawn dawn ila, point hlawh chhuak zel turin kan ṭha tawk. Ka duhthusam ka sawi emaw in ti mai thei a, mahse thil nihna tak ka sawi a ni," a ti.

Warnock-a'n eng team pawh an hneh theih thu a sawi hi Liverpool a vauna a ni a, sawi fo tawh ṭhin angin tlak hlau team hi champion tum team nen an hlauhawm dan a in nep hleih chuang lo.

Liverpool boss Klopp pawhin Cardiff hlauhawmna a hai lo. German coach chuan, "CL semifinal kan lut a, tun atana pawimawh ber erawh Cardiff a ni. Barcelona laka kan khelh dan tur ngaihtuah a la hun lo a, 100% in Cardiff chiah ka ngaihtuah ang, " tiin a sawi.

Zanin Inkhel Tur
Manchester City 5:00 PM Tottenham Hotspur
AFC Bournemouth 7:30 PM Fulham
Huddersfield Town 7:30 PM Watford
West Ham United 7:30 PM Leicester City
Wolverhampton 7:30 PM Brighton & Hove
Newcastle United 10:00 PM Southampton

April 21, Pathianni
Everton 6:00 PM Manchester United
Arsenal 8:30 PM Crystal Palace
Cardiff City 8:30 PM Liverpool

April 22, Thawhṭanni zan
Chelsea 12:30 AM Burnley