Pukpui hnehin Zotlang an tlang

HPC Cup semifinal hnuhnung zawk chu Ningani chhun khan khelh a ni a, Zotlang chuan C. Lalrosanga goal khat hmangin Pukpui 1-0 in an hneh a, final an lut. Thawhṭanniah Zobawk South nen final an khel ang.

Ṭhuamluaia Muala inkhela Aizawl FC defender Rosanga'n minute 20-naa a cross tum chu goal-ah a lut, Pukpui goalkeeper-in a chhut sual vangin a sawh khum a, an defender pakhatin lo pet chhuak mah se yard 10 vela awm goalline referee leh assistant referee-in a goal tih an nemnghet.

Goal luh danah Pukpui player an lungawi lo a, player pahnih chu mawi lo taka official laka an chet avangin hnawhchhuah an ni. Pukpui player ten mual chhuahsanin hun eng emaw chen inkhel a khaihlak. Official phalna la ni lo mual chhuahsan vangin player pakua te chu yellow card pek an ni bawk.

Inkhel chhunzawm leh a nih hnuah player pakua a khel Pukpuiin thapui an thawh a, ṭantu an neih ṭhat bawk avangin an zam lo. Zotlang goalkeeper Lalawmpuia chhaih buai viau mah se an vannei tawk lo, Aizawl FC goalkeeper hi man of the match atan thlan zui a ni.

Zotlang tan kum 2015 final-a Electric Veng an hneh loh hnua final an thlen leh hmasak ber niin; Pukpui erawh a zawnin semifinal-ah vawi thum an tla ta a ni.