Hnehna nena bul ṭan Chhinga Veng

Suzuki Gixxer Pro Volleyball League khelh kal laiah Chhinga Veng Spikers chuan bul an ṭan fuh hle, season hmasa finalist Tuichangral chu 15-11, 15-13, 18-16, 15-10, 15-11 in an hneh.

Nilaini zan inkhelah Chhinga Veng tan Mandeep Singh chu player pawimawh leh langsar a ni a, India senior team rinrawl lo ni tawh thin Mandeep hi RS Traders Player of the Night-a thlan a ni.

Tualchhung volleyball inelna sang berah hian set nga (point 15 game) an khel a, set khat an lak hian point khat zel an hmu. A tawpah a sang paliin semifinal an khel ang. Chhinga Veng hian set an lak vek avangin duhthusama ṭhain bul an ṭan.

Chawnpui Sports Centre-a inkhelah set nga an inkhelh chhungin Mandeep chuan point 33 thawk chhuakin point riat a hloh. Spikers tan Mizo player zingah point 10 hmu phak an awm lo a, Lallianmawia Pachuau chuan point kua hlawhin vawi khat a tisual.

Tuichangral tan Jaideep Singh-a'n ṭum 24 vaw tlain vawi sarih a tisual a, amah thlawp thei ber Lalrinchhana'n point kua hmuin point li a paih. An ball vawrh a ṭha tawk lo a, player dang mi mala point nga hmu phak an awm lo.

Zanin hian a hmun ngaiah inkhel a awm leh dawn, champion lai Hunthar chuan tualchhung team hlun dang TNT, Muanna Veng an hmachhawn dawn. Hunthar leh TNT te hi fans nei ṭha an ni a, PVL bakah Mizoram Volleyball Association hnuaia inelna hrang hrangah hlawhtling taka inlan tawh ṭhin an nih avangin inkhel a hmuhnawm ang - senior team an inlan hmain Under 18 team an inkhel leh ang.