Arteta-a Arsenal an chak zel

Video Assistant Referee hmanga Arsenal goal khung endik a nih hnuah pawm a ni a, an mikhual West Ham chu 1-0 a hnehin Mikel Arteta nauten point thum hlu tak an hlawh chhuak.

Inrinni zan Emirates Stadium-a Premier League inkhelah Gunners lamin inkhel thunun viau mah se goal an nei mai thei lo. Bench aṭanga rawn lut Alexandre Lacazette chuan hun tawp hma hminute 12 chauh a awm tawh tihin chakna goal a khung.

Striker Lacazette goal khung tur siamsaktu Mesut Ozil chu offside nia ngaiin a tirah chuan goal hi pawm a ni lo, VAR hmanga minute hnih deuh thaw an endik hnuah goal atana pawm a ni chauh.Arsenal manager Arteta chuan, "Team lian chuan an khelh ṭhat loh niah pawh point thum an hmu ṭhin. Kan result avangin ka lawm a, inkhel kha uluk taka kan thlir a nih erawh chuan hmasawnna tur kan la ngah hle," a ti.Nikum December thla tawp lam aṭangin Arteta hian Gunners hi a enkawl ṭan a, league match bikah chuan vawi khat chauh chak loh a la nei; kum 2020 chinah chuan tlawm nei loin an kaltluang mek.North London club hian point 40 hmuin pakuana dinhmun an luah mek, palina Chelsea an phak lohna chu point nga chauh a ni a, khelh hmabak match 10 ngawt an la neih avangin season thara Champions League khelh an la beisei ngam.