Man City pet tlatu Spurs-Premier League-ah phuba?

Tottenham Hostpur chuan Manchester City chu Champions League aṭangin an pet chhuak a, 'nomawi pali - quadruple' beiseina an tihtawp sak. Spurs hi second leg bikah 4-3 in tlawm mah se an mualah 1-0 a an chak avangin 'away goal rule' hmangin semifinal an lut.

Vawiin tlai dar 5:00 hian Premier League club ṭha pahnih hi Etihad Stadium-ah an inhmachhawn lehnghal dawn a, Man City hian phuba an la dawn nge league nomawi chawi tura an ṭan hmun a phet dawn tih zawhna chhanin a awm ang.

Inkhel ropui

Nilaini zan khan Eithad Stadium-ah Man City-in goal khat phur sain Tottenham an mikhual a, football ngainatute hmuhnawm tih ber goal hmuh tur a tam hle.

Team ṭha zawka ngaih Man City-in attacking football an khel dawn tih chu tlang hriat a ni a, amaherawhchu Harry Kane tel lohna Spurs-in attacking football vekin an chhanglet a, mi nawlpui beisei ngam loh hi Poch-a leh a hoten an ngam.

Minute 21 chhung lekin goal nga a lut tawh a, theihna sang leh tihsual a inchawh pawlh a, pressure sang lutukah tih dik reng theih a ni lo. Jose Mourinho leh manager ṭhenkhatin uchuak taka 'goal venhim' an hlawhtlinpui hnua hetiang anga mahni naute khelhtir ngam Pep Guardiola leh Mauricio Pochettino te an fakawm hle.

Europe-a inelna sang berah Asian tlangval Son Heung-min a thiamzia a lang a, goal pawimawh ber khung lo mah se a goal khung pahnih chu team ropui Man City tlakna chhan a ni a. Inkhel hmuhnawm bik a nih angin a tawp thlengin boruak awm dan a inthlak thleng reng bawk.

A tawpah 'drama'

Tottenham tan Fernando Llorente chuan minute 73-naah goal pawimawh ber a khung a, VAR hmanga en let a nih hnuah goal hi pawm sak ni mah se replay ṭhenkhatah erawh Spanish striker kut hian ball a fuh niin a lang.

Man City vanduaina a kaltluang, minute 90-naa Sterling-a goal khung chu semifinal luhnaah an ngai hman a, Etihad Stadium-ah thawm a ring hle. Mahse VAR in boruak awm dan rawn thlakin English forward ball petu Sergio Aguero chu a offside vangin pawm a ni lo a, Pep Guardiola ṭhingṭhi hnawk chuan thil awm dan a sawifiah - a thawhrim leh a remhriatna bakah an sum sen ṭhahnem tak chuan UCL nomawi a la keng tel lo.

City media team pawh an insum thei lo, twitter-ah an rilru put hmang ni awm fahranin thu awmze nei lo 'wfiuhefijvbeojefvnojegfnvepgfjevgpinbgw' tih an ziak. Spurs lawmna a san ang chiahin City tawrh hi a na em a ni.

Pep a puitling

City manager Pep Guardiola chuan, "Kan chak loh dan a na takzet a, kan pawm erawh a ṭul. Manchester City ka enkawl hnuah khatiang anga thawm ṭha kha ka la hre lo a, player leh fan-te ka chhuang takzet a ni. Tottenham ka lawmpui a, semifinal atan duhsakna ka hlan. VAR chungchangah erawh tun hma ang thoin hman ṭha ka la ti reng a, referee hman camera bikah handball kha an la fuh lo," tiin a sawi.

Spanish manger Pep chuan sawi chhunzawmin, "A hautak takzet a, kan la hmachhawn turte pawh a la hautak zel ang. Mahse chumi hmachhawn tur chuan kan inpeih tur a ni," tiin Premier League-ah chetsual nawn an tum lo. Man City hian Spurs lakah point an hloh a nih chuan an elpui Liverpool khingpui a awlsam tawh avangin an nomawi kawl lai chan thei dinhmunah an ding.

Poch a lawm

Tottenham manager Mauricio Pochettino chuan, "A tawp dan kha beisei phak bak a ni. Kan hnual takzet a, thutlukna an thlak leh ta hlauh. Hei hi football kan ngainat chhan a ni a, kan rilru a puitling a, kan huaisen takzet a ni," tiin inkhel chungchang a sawi.

Spurs hi league-ah inthlahdah theih an la ni lo. Man City laka an chak zo lo a nih chuan an hmelma Arsenal hnuaia awm thei an ni a, chu aia pawi zawk chu season thara Champions League khel lo thei an la ni.

Goal sarih leh VAR
Tottenham Stadium-ah Son Heung-min goal hmangin London club hi1-0 in an chak a, first leg-a goal an chhuah loh avangin Etihad Stadium-ah goal an khung phawt chuan Manchester City tan semifinal lut turin goal hnih tala chak a ngai.

Raheem Sterling chuan Kevin De Bruyne ball pek chu box vei lamah changin pet turin a insiam nghal a, a hmaa awm Spurs player paliin hnaih hman loin goal kilah mawi takin a hlai lut. Guardiola chuan a kut tum a hum ruh a, semifinal a beisei tih hmuh hmaih theih a ni lo.

Son Heung-min chuan a zawna ball tla fuh chu goal-ah pet nghalin siphurh a sut. Christian Eriksen-a ball pek a hlauhawm laia tipertu City defender Aymeric Laporte leh keeper Ederson-a te chu mawhphurtu an ni. Son Heung-min chuan Sterling-a tih theih chu a thei ve tih a pholang a, Asian tlangval hian Eriksen-a hnen aṭanga a ball hmuh chu vei lam aṭangin a ke dinglamin goal kilah a dah. City tlarhnung a pherh takzet.

Bernardo Silva chuan Sergio Aguero ball pek chu 'cool' takin a khung. Spurs defender Danny Rose-a'n a khawih kawi avangin keeper Hugo Lloris dem theih a ni lo a, pressure sanga B. Silva ball petu Aguero hawi zau zia chu inkhela eizawng tur tan chuan zir tham a tling.

Raheem Sterling chuan ding lam aṭanga Kevin De Bruyne ball pek chu second leg bika hmahruai nan a khung. KDB-a'n Spurs defender leh keeper inkarah lei hrulin a pet a, player nazawng tih theih a ni lo - goal khungtu Sterling lah a form lai ni bawkin awlsam hmel takin a khung.

Minute 21 lek chhungin goal nga a lut tawh a, aggregate-ah 3-3 niin away goal rule hmangin Spurs chu tlang zawk thei dinhmunah an ding. Sergio Aguero chuan KDB hnen aṭanga a ball hmuh chu angle zim tawh tak aṭangin a pet goal, Argentine forward hriamzia a lan rualin keeper Lloris-a'n a tihtur a ti lo. Belgian midfielder KDB chuan assist nei tur hian Victor Wanyama awlsam takin a bum a, player thiam bik vangin Spurs tlarhnung inrem ṭha tak ṭhiah a ni a, London club hi tla thei dinhmunah an ding.

Fernando Llorente chuan Kieran Trippier-a corner pet chu a khel bawrin a su lut a, Spanish striker kutin ball a fuh em tih chu VAR hmangin en let a ni a, a fuh loh anga an hmuh avangin goal-ah pawm a ni. VAR bawk! Aguero chuan Sterling hnenah ball a pe a, English forward hian a petna tur khawp mawi taka a insiam hnuah goal-ah a khung. Amaherawhchu VAR hmangin en let a ni a, Sterling ball petu Aguero chu a offiside miau avangin goal-ah pawm theih a ni lo.

Manchester City-in Etihad Stadium-ah 4-3 in hnehna chang mah se khualmualah 1-0 a an chak loh avangin aggregate-ah 4-4 a ni a, Pep Guardiola hote hi away goal rule hmangin an tla.