Asian Senior C'ships hmachhawn tur Jeremy

Tokyo Olympic 2020 qualifier zinga pakhat Asian Senior Weightlifting Championships 2019 chu Ningbo, China-ah neih mek a ni a, Mizo rawlthar Jeremy Lalrinnunga chuan Pathianni zan hian 67 kg huangah a chawi ang.

Olympic khel tur hian championship paruk tal an khelh a ngai a. Category hrang hrangah lifter ṭha 14 chin an inlan dawn. Weightlifter pariat chu April 30, 2020-a ranking sang pariat an ni dawn a, panga chu khawmualpui bik ranking sang leh, hmun ruak dang pakhat chu a thlengtu emaw sawm bik ram aṭangin a ni ang.

February thla khan 2019 EGAT's Cup International Championships-ah Jeremy hi inlan tawhin silver medal a chawi chhuak a, hemi ṭum hian snatch-ah 131 kg leh clean & jerk-ah 157kg chawiin a belhkhawmin 288kg a chawi a ni. Tun ṭuma an zinchhuah dawna trial an neihnaah a record hmasa hi kg ruka (6 kg) a khum theih avangin beiseina pawh a sang hle.

Youth Olympic gold medalist Jeremy chuan, "Inelna lian a nih tawh avangin midang pawh an chakin an theihna a sang hlawm em em a, ka tan pawh chona a hautakin a harsa chho ve zel. Mahse, inrintawkna sang tak ka nei a, Pathian leh kan ram tan theihtawp ka chhuah chhunzawm zel dawn a ni," tiin Vanglaini a hrilh a, amah ṭawngṭai pui turin Mizo mipuite a sawm bawk.