Dubai-ah Sangtea'n hnehna chang

Mizo professional boxer hmasa ber Lalrinsanga chuan Zirtawpni zan khan Caesars Bluewaters, Dubai-ah Tanzania boxer Haidari Mchanjo chu unanimous decision-in a hneh.

Mizo tlangval inlanna hi 'The Rotunda Rumble 3' tih a ni a, YouTube aṭanga entu pawh an tam hle. Khawruhlian tlangval Sangtea inlanna category hi featherweight a ni a, round ruk awmin Mizo boxer hian knockout lo mah se Tanzania boxer lakah a chungnung hle.

Sete Boxing Academy-a inzir Sangtea hian professional fight vawi lia hnehna a channa chiah a ni a, a la chak vek. Nikum September thla khan Delhi-ah Mahesh Digari chu unanimous decision-in a hneh a, kumin January 26 leh February 1 khan Malika Arjun leh Mukesh te first round-ah ve ve a knockout.

Sangtea tan tun ṭum hi international fight a hmachhawn hmasak ber a ni a, inelna a hmachhawn tawha lian ber a nih bawk avangin hnehna a chan hi a hlu hle.The Rotunda Rumble 3-a fight lian berah Aliu Bamidele Lasisi leh Norbelto Jimenez ten WBC International super flyweight title an inchuh a, chak zawk an awm lo. Lasisi chuan, "Ka khingpui a ṭha a, tun hmain world title fight a hmachhawn tawh avangin khelh a harsa. Kan inhnehtawk erawh ka pawm lo a, chak zawkah ka inngai," tiin a sawi.