COVID-19 vangin Mizoram sorkarin International boundary a khâr dawn Ram dang mi rawn luh khap rih a ni

Tunlaia hri léng mek COVID-19 (Coronavirus) chu Mizorama a rawn luh lohna atana hmalak dan tur sawihoin nimin khan chief minister Zoramthanga hoin minister, official leh pawl hrang hrang aiawhte Chief Minister's Office (CMO) conference hall-ah an ṭhukhawm. He hunah hian Mizorama international boundary khâr an rèl bakah, ram dang mi Mizorama an rawh luh khap rih an rél.

Chief Minister chuan, COVID-19 chu Mizoramin engtin nge a do theih ang tih ngaihtuah tura kalkhawm an nih thu a sawi a, "Kan invenna turin eng nge kan tih ang? International border leh state dang nena kan inkalpawhna engtin nge kan tihphui ang tihte ngaihtuah a ngai. Kan châkkhai lak luhnate a ni si a, tihphui vek chi chu a ni lo. Punkhawm luai luai pumpelhte a ṭha em tihte ngaihtuah a ṭul a ni," a ti.Mizoram chhunga inven­­­­na atan engte nge ma­mawh tih ngaihtuah a ṭul thu sawiin Zoramthanga chuan, "Damdawi leh mask (hmai tuamna)-te engzat nge mamawh a nih tihte ngaihtuah a ṭul," a ti a, sum awm ang ang hman a nih tur thu a sawi.

Health minister Dr R Lalthangliana chuan, hri léng hriat a nih veleh meeting an koh nghal thu sawiin, "State bakah district tinah task force din nghal a ni. Health department ringawt tan tihngaihna a awm lo. Ram dang nena ramri kan neih Zokhawthar leh Kawrpuichhuahahte screening point siam a ni a, international boundary km. 720-a thui kan nei a, a buaithlak khawp mai,"  a ti. Ṭhutkhawmnaa an rèl dan chuan, Bangladesh leh Myanmar nena Mizoramin ramri a neihte chu khar a ni dawn. Ramri kân tumte véng turin Mizoram police, Assam Rifles leh BSF sipaite hman a nih dawn bakah, a bul hnaia khawtlang hruaitute puihna dil tum a ni. Ṭul bik thila Myanmar aṭanga Mizo­rama rawn lut turte chu Zo­khawthar aṭangin a luh theih dawn a, uluk taka endik an ni ang.

State dang nena Mizoramin ramri a neihna hmunte pawh sorkarin inkal pawhna atana a pawm bâk chu khâr a ni dawn. Ram dang mite chu lirthei emaw, thlawhtheihna emaw hmanga Mizoram an rawn luh hun eng emaw chhung atan khap a ni hrih. Assam aṭanga Mizoram lut turte chu Vairengte leh Bairabi aṭanga luh tur a ni a, Manipur aṭanga lut turte Khawkawn (Ngopa lam)-aṭangin, Tripura aṭanga lut turte Kanhmun aṭangin luh tur a ni a, hmun dang 

aṭangin Mizoramah luh phal a ni lo ang. Mizoram luh theihna hrang hrangte hi Mizoramin chakkhai a lakluhna ṭhin pangngai a ni. Dan pangngai angin bungrua chu a rawn lut thei reng dawn a, khualzinte erawh ṭul bik thilah lo chuan luh tir an ni lo ang. Kawng khar turte hi chu state dang aṭanga dan loa Mizoram an rawn luhnate a ni deuh ber.

Phalna hmun aṭanga Mizorama rawn lut turte chu uluk takin checkgate-ah an hriselna dinhmun endik a nih bakah, an kalna hmun tur leh an address-te uluk taka chhinchhiah vek a ni dawn. Meeting-a tarlan danin, COVID-19 avang hian Mizo­ramah mi 67 khung hran an ni tawh a, chung zinga paruk chu khung hran hun a tàwp hnuah COVID-19 an kai lo tih finfah anih avangin chhuahtir an ni tawh. Khung hrante zinga pathum chu damdawi-inah khung hran an ni a, a bak zawng chu anmahni ina khung hran an ni thung. Hetih lai hian, Mizorama COVID-19 kai nia rinhlelh sample thawn zingah positive a la awm lo. 

Meeting zawh hian Health minister Dr R Lalthangliana chuan a pisaah thuthar theh­darhtute kawmin, COVID-19 avangin chiaina lutuk tur a awm loh thu sawiin, "Sorkarin theihtawp a chhuah mek zel a ni. Chief Secretary kaih­hruaina hnuaiah State Level Task Force din a ni a, anni hian theihtawpin hma an la dawn. Budget-ah sum awm lo mah se, sample test-na tur khawl lei a ni ang," a ti. Health Minister ṭawiawmtu chief secretary Lalnunmawia Chuaungo chuan COVID-19 chungchangah thudik si lo, mipui ti chiai thei social media-a thehdarh an awm a nih chuan dan awm sa anga hrem an nih tur thu a sawi.