Youth World record siamtu Jeremy
Jeremy Lalrinnunga chuan nimin khan Asian Senior Weightlifting Championships 2019 a khel a, Mizo weightlifter hian 67kg huanga inelna pakhat zawk snatch-ah 134kg chawiin Youth World record a siam. Inelna hi senior level nimah se Jeremy hi kum 18 hnuai lam a la nih avangin a chawi zat hi Youth World record huanga dah a ni.
Govt. Complex rawlthar Jeremy hian a pumpuiah 297kg (snatch 134kg, clean & jerk 163kg) chawiin group B-ah pahnihna a ni, a chungah hian Pakistan tlangval 304kg chawitu Talha Talib (140kg+164kg) a awm.
Nizan khan group A lamin an chawi chhunzawm ve leh a, group pahniha a tiṭhate hian medal an dawng ang - he thu buatsaih lai hian group A lam result kan hriat hman loh avangin a pumpuia Jeremy dinhmun tak a chiang hman lo a ni.
Weightlifting-ah hian rit chawi dan chi hnih, snatch leh clean & jerk a awm. Kumin kumtir lam khan Jeremy hian snatch huangah hian 131kg chawiin Youth bikah Asian record a lo siam tawh a, tunah chuan ama record bawk hi a rawn khum.
Tun ṭuma an inelna Asian Senior Weightlifting Championships 2019 hi Tokyo Olympic qualifier zinga pakhat a ni a, infiamna khawmpui lian ber kalkawng a nih avangin a pawimawh hle. February thla khan 2019 EGAT's Cup International Championships-ah Jeremy hi inlan tawhin silver medal a chawi chhuak tawh a ni.
EGAT's Cup International Championships an khelh ṭum hian a pumpuiah 288kg a chawi tawh a, tun ṭumah hian 9kg-a a khum theih avangin Mizo rawlthar duhawm hian hma a sawn zel - Olympic tak khel tur erawh chuan kawng thui tak zawh tur a la awm tih erawh hriat tel a ṭha thung.
Weightlifting Kalhmang
SNATCH : Ritchawitu (lifter) chuan a hmaa ritchawina thir tlawn (bar) chu ding leh vei lamah khap khat (1) ve vein a teh ang a, kutphah khinghnihin hnuai lam hawiin nghet takin a man ang. Lei aṭangin thawklehkhatah a lu chungah a chawikang thut ang a, a lu chungah a ban khinghnihin ngil takin a mar chho ang. Hemi chhung hian ke phah chauh lo chuan lei a si tur a ni lo a, ban leh ke te chu ngil taka din chhoh pui tur a ni. Referee-in chhuata dah tura a tih hma loh chuan dah thlak tur a ni lo.
CLEAN & JERK : Ritchawitu (lifter) chuan a hmaa ritchawina thir tlawn (bar) chu ding leh vei lamah khap hnih (2) ve vein a teh ang a, kutphah khinghnihin hnuai lam hawiin nghet takin a man ang. Lei aṭangin thawklehkhatah kar chungin emaw a rem danin thir tlawn chu a chawi ang a, a awmna tur a thlen hma chuan a taksa bung dang a khawih tur a ni lo. Thir tlawn chu a awm (khingkhangruh) chungah nghawng dekin kiu thlepin a awm tur a ni a, heta ṭang hian a remchan danin ngil takin a char chho nghal tur a ni. A ke hma leh hnung lam kar a insiam rem hnuah ngil takin a dah tur a ni a. Referee-in chhuat a dah tur a tih hma loh chuan dah thlak loh tur a ni.