Vawiinah HPC Cup final - Zobawk South vs Zotlang

Lunglei DFA hnuaia inelna lian leh ngaihhlut hlawh ber HPC Cup 2019 chu vawiin chawhnu dar 1:00 hian Ṭhuamluaia Mualah final khelh a ni dawn a, nomawi kawl mektu Zobawk South leh 2015 finalist Zotlang te an inhmachhawn ang.

Champion lai Zobawk South hi tun hnai kum li chhung khan player an neih ṭhat avanga champion tura rinkai an ni ṭhin a, kum thum chhung a zawna semifinal bak an thlen theih loh hnuah nikum khan final lutin Cherhlun 2-1 a hnehin an champion.

Nikum final-a Zobawk South chakna goal hnih khungtu Jessy Vanlalmuana leh Isaac Lalruatpuia te chu hrem leh hna ṭul dang vangin an chhawr thei dawn lo. Mahse, tlarhma lamah India Junior Camp-a koh tawh Lalthlamuanpuia an la nei a, Lallianzama chu final khel turin a let a, midfield luahlum turin ZD Laltlansanga an la nei bawk.

Zotlang hi team ṭha tak ni ṭhin mah se HPC Cup-ah sulhnu an nei ṭha tawk lo. 2015 final an luh ṭum pawhin Electric Veng lakah ṭum hnih hma hruai mah se an goal neih an hum zo lo, kuminah tlarhnung venhim an ngai pawimawh hle ang.

HPC Cup-ah player pathum lak belh theih a nih angin Aizawl FC player pahnih - keeper Lalawmpuia leh midfielder Paul Ramfangzauva te bakah Chhinga Veng FC aṭangin striker Lalremruata an la. Player tawnhriat ngah AFC defender C. Lalrosanga, Zodinthara Tlau (Tetea Tlau), HS Lalremtluanga leh C. Vanlalhlua an la neih bawk avangin a vawi khat nan champion an tum hle.