Mizoramin Punjab an sawp

Hero Junior Girl's National Football Championships 2019-ah Mizoram chuan nimin khan an match hmasa ber an khel a, Punjab 9-0 in an sawp. Mizoram hi group H-ah Andhra Pradesh, Kerala leh Punjab te nen an awmho a, April 23 zing dar 7:15 hian Andhra Pradesh nen an inhmachhawn leh ang. Inelna hi Kolhapur, Maharashtra-ah neih a ni.

Mizoram tan hian Darlawn tleirawl Lalrinmuani (Chanmari WFC) chuan hattrick a siam a, Bukpui tleirawl Lalnunsiami'n (Vakiria FC) goal hnih a khung bakah Champhai Vengthar tleirawl Lalhlupuii Varte (Maubawk WFC), Siaha tleirawl K. Ngopawdi (Siaha DFA), Sesawng tleirawl Nancy Lalhlimpuii (Siaha DFA) leh ITI Veng tleirawl Vanlalnghaki (Chanmari WFC) ten goal khat ṭheuh an khung.

Inelnaah hian team 27 an tel a, group pariatah ṭhendarh an ni a. Group khat aṭangin team khat chauhin quarterfinal an lut dawn. Mizoram manager Mary Lalawmpuii (Lakuri) chuan, "Hnehna kan chang hi kan lawm a, chutihrualin referee thutlukna dik se chuan goal li dang khung belh thei turah kan inngai. Group khat aṭangin pakhat chauh tlang tur a nih avangin goal khung tam hi a pawimawh em em a ni," tiin Vanglaini a hrilh.

Ṭhuampui nu Lakuri chuan sawi chhunzawmin, "Player hrechiang tak coach ṭha tak (Vanlalpeka, Lawngtlai) kan nei a, kan vannei hle. MFA Women's Committee, MFA, in lama kan nu leh pa te bakah Mizo mipui kan chanchin ngaihvena min ṭawngṭai saktute zawng zawng chungah lawmthu kan sawi a, kan khelh hmabak atan min ṭawngṭai sak zel turin kan ngen a ni," tiin a sawi.