PFA Player of the Year

Professional Footballers' Association Players' Player of the Year award dawng thei tur hming chhawpchhuah a ni ta a, Liverpool defender Virgil van Dijk leh Manchester City forward Raheem Sterling hming a lansarh viau laiin Mohamed Salah erawh chhawpchhuah zingah a tel lo.

PFA Players' Player of the Year chawimawina dawng thei tur hian player paruk hming chhawpchhuah a ni a, Man­chester City chuan player pathum thawhin a thawh hnem ber an ni.

City player zingah hian Sterling bakah midfielder Ber­nardo Silva, winger Raheem Sterling leh forward Sergio Aguero-te chu telh an ni a, Liver­pool-in Van Dijk bakah forward Sadio Mane an thawh bawk.

Chelsea-in season an hmang ṭha lo chungin Eden Hazard thiamna erawh hmuh hmaih theih a ni lo a, Real Madrid nena sawi zawm mek forward hi City leh Liverpool player ni lo zinga award dawng tura chhawpchhuah awmchhun a ni.

Sterling & Van Dijk

Tun dinhmuna PFA chawi­mawina sang ber dawng tura rin hlawh ber chu Sterling leh Van Dijk te an ni a, season an hman dan ngaihtuahin thil awm lo a ni lo.

Sterling hi City-in Premier League nomawi an beiseina kawngah player pawimawh a ni a, inelna hrang hrangah goal 23 khung tling der tawhin assist vawi 13 a nei tawh bawk.

Pound maktaduai 75 man Van Dijk-a'n a thiamna a pholang zel. Kum 27 mi defender hian tun season-ah match 43 khel tawhin vawi 22 clean sheet a nei a, goal nga a khung tawh.

Van Dijk hi Premier League-a khingpui ball chhuhsak hnem ber a ni a, an khingpui player nena ball an inchuh 77%-ah a hlawhtling thei a ni.

Mane & Silva

Senegal forward Mane-a'n English football-a a season duhawm ber a hmang mek a, inelna hrang hrangah match 43-a khelhah goal 22 khungin assist vawi nga a nei tawh.

Mane hian Liverpool tlar­hma hriat reng tawh tur Salah leh Roberto Firmino-te nen an 'din' a, an pathum an inkawp tawh chuan an khingpui tlarhnung tan thawk lakna tur a vang ṭhin.

Kevin de Bruyne inhliam hlanin Bernardo Silva-a'n City-ah a hmun a sawh nghet a, Por­­tugal international hi tun season-a City-in league nomawi an beisei chhanah player langsar a ni.

Silva hian central midfield-ah a hun tam zawk a hmang chungin inelna hrang hranga match 45-a khelhah goal 12 a khung der tawh a, vawi 12 a ṭhiante khung tur a siamsak tawh bawk.

Aguero & Hazard

A dan pangngaiin Sergio Aguero-a'n season duhawm tak a hmang mek a, inelna hrang hrangah goal 30 a khung tling leh der tawh - Argentine forward hian tun hnai season riatah season nga chu goal 30 a khung tling ziah.

Aguero hian tun season-ah inelna hrang hrangah match 41 khel tawhin assist vawi kua a nei bawk a, Premier League-ah goal 19 khung tawhin he thuziah lai hian Salah nen league-a an goal khung zat a in ang mek. Hriat tel atana ṭha erawh Salah aiin minute 700 chuangin a khel tlem zawk.

Tun hnai kum nga chhunga PFA team of the year-a vawi li lang thei a ni miau a, Hazard ropuina sawi nep theih a ni lo. Chelsea forward hian tun season inelna hrang hrangah match 44 khelin goal 19 a khung a, assist vawi 12 a nei bawk.

Premier League-ah goal 28 (16 goals, 12 assists)-ah a inrawlh a, a chhuanawm hle. Blues fans tana hriat nuam lo tur erawh Real-in an thlithlai reng hi a ni ang.

Naupang rual

PFA Young Player of the Year thlan a ni dawn bawk a, he chawimawina dawng tur hian Sterling chu hming langsar bera chhal ngam a ni - season hmasa khan a lo dawng tawh.

City-a Sterling nena khel dun Bernardo Silva chu he chawimawina dawng thei tura hming chhawp zingah hian a tel bawk a, ani pawh hi en kan ngawt a harsa ang.

Manchester United forward Marcus Rashford, Liverpool right back Trent Alexander-Arnold, West Ham midfielder Declan Rice leh Bournemouth midfielder David Brooks-te pawh hi dawng awm tak vek an ni.

PFA Young Player of the Year chawimawina dawng tur hian player chu season ṭan dawn khan kum 23 aia naupang an nih a ngai - award hi April 28-ah semchhuah a ni ang.