Kohli a ropui leh ta

Zirtawpni zan Indian Premier League inkhel­ah Virat Kohli ropuina hmuhtir kan ni a, Royal Challengers Bangalore tan ball 58-a hmachhawnah century vaw chhuakin a team a chakpui.

RCB hian over 20-ah run 213 siamin wicket li an hloh a, Kohli-a'n run 100 a siam bakah hian Moeen Ali chuan run 66 a vaw chhuak ve bawk.

Kolkata Knight Ri­ders an duai bik lo. Nitish Rana chuan run 85 rawn siamin a tawp thleng a dam a, Andre Russell chuan run 65-a vaw chhuak bawk - a pui hle.

Mahse, KKR hian over 20-ah wicket nga lek hloha run 203 an siam zuiin an target chu run sawmin an la um phak lo cheu a, a tlawm zawkah an ṭang ta a ni.

Inrinni zan IPL inkhel­ah Delhi Capitals chuan wicket ngain Kings XI Punjab an hneh. Kings XI hian over 20-ah run 163 siamin wicket sarih an hloh a, Chris Gayle chuan run 69 a siam.

Mahse, Delhi tan Shre­yas Iyer chuan run 58 siamin a tawp thleng a dam a, Shikhar Dhawan chuan run 56 vaw chhuak ve bawkin over 19.4-ah an target an umpha a, wicket nga hloh chungin hnehna an chang ta a ni.

Rajasthan Royals chuan wicket nga veka Mumbai Indians ngamin hnehna an chang bawk a, run 59 siama a tawp thleng dam Steve Smith a che ṭha hle. Royals hian result ṭha an neih loh avangin Australian batsman Steve Smith hi captain atan an hmang a, team kaihruaitu nichunga match hmasa berah hneh­na a chanpui nghal.

MI hian Quinton de Kock (65) chet ṭhat zarzoin over 20-ah run 161 an tlin a, wicket nga an hloh. Mahse, Rajasthan club tan Smith a chet ṭhat avangin over 19.1-ah an target umphain RR hi an chak ta a ni.