Serie A champion Juventus

Juventus chuan goal an phurh hmasak hnuah Fiorentina 2-1 a hneh letin Serie A champion an ni a, tun hnai season riat chhung zet chu a zawnin 'Scudetto' an la ta.

Italian champion an ni tih a chian hnu lawkah Cristiano Ronaldo chuan Turin club chhuahsan tum anga an sawina a chhang, "Ka season hmasa berah Serie A title kan lak avangin ka hlim hle. Champions League-ah hlawhtling nghal lo mah ila, season thar a la awm a lawm," a ti a, Turin club-ah 1000% in cham a tum thu a sawi bawk.

Nomawi chu

Massimiliano Allegri naute hian kar hmasa khan nomawi chawi theihna hun ṭha an neih chu SPAL lakah 2-1 a an chak loh avangin a tlawlh tawh. Inrinni zan inkhelah pawh minute rukna leka Nikola Milenkovic goal hmangin Juventus hi an hnufual.

Juventus Stadium-ah champion lawm tuma pungkhawm fans an hrilhhai a, match hmasa angin an chetsual nawn an hlau. Mahse, chawlhlawk hma deuhin Alex Sandro-a'n an siphurh a sut a, second half minute 53-naah Ronaldo cross chu defender German Pezzella-a'n anmahni lamah a ti lut palh.

Italian football inelna sang berah Juventus hi vawi 35 an champion-na chiah a ni a. Kum 2011 aṭanga Allianz Stadium an luah hnuah season tin Italian league title an la ziah a, mahse tun season hian Coppa Italia nomawi an kawl lai an hloh bakah, Ajax hneh loin Champions League aṭanga an tlak avangin an lawmna a famkim lo ang.

Ronaldo a hlim

Real Madrid aṭanga Juventus zawmtu Ronaldo hi England (Premier League), Spain (La Liga) leh Italy (Serie A) champion a ni kim ta a, European league lian pathuma champion thei player awmchhun a ni.

Kum 34 mi Ronaldo chuan, "England leh Spain-ah ka hlawhtling tawh a, tunah chuan Italy-ah a ni ve thung. Season duhawm tak a ni, league bakah Super Cup kan la bawk. Nakkumah chuan Champions League title lak ngei kan tum ang," tiin UCL title duh vanga an lakluh a nihna a hrechiang hle.

Juve manager Allegri chuan, "Match nga khelh hmabak nei chunga Scudetto lak theih hi a ropui, season hmasa kha chuan match hnih chauh khelh hmabak awm tawhah pawh khan Napoli nen kan inel na hle, kuminah erawh nasa takin hma kan sawn," a ti.