MFA Women's League-ah 'upset' a thleng

Mizoram Football Association buatsaih Women's League hmasa ber semifinal chu Inrinni khan Lammualah khelh a ni a, league round-a hneh loh tawng lo Vakiria FC leh anmahni hnaih bertu Chanmari Women's FC ten final an thleng zo lo.

Semifinal hmasa zawkah Maubawk Women's FC chuan Vakiria FC chu 2-1 in an lehthal a, inkhel hnuhnung zawkah GSA ITI Veng chuan Chanmari Women's FC chu 1-0 in an hneh ve bawk. Final hi April 23, Thawhlehni tlai dar 4:30-ah khelh a ni ang.

Football-ah thilmak a thleng fo a, Vakiria FC hian Maubawk hi league round-ah 3-0 leh 3-1 in an hneh a, final lut tur chianga ngaih an ni. Semifinal-ah pawh hian Vakiria hian an 'star player' Grace H. Lalrampari hmangin minute 62-naah hma an hruai a, final thleng turin minute 10 vel awrh chiah goal chhuah loh an mamawh.

Amaherawhchu injury time-ah Maubawk tan Zairemmawii'n siphurh a sut a, hun a tawp zui. Extra time khelh a nih hnuah Maubawk-in penalty an hmu a, Zairemmawii bawkin penalty aṭangin chakna goal a khung. Maubawk-in history siamna remchang an nei a, team ṭha ber an hneh avangin Women's League nomawi hmasa ber chawi turin an inrintawk phah khawp ang.

Maubawk result-in GSA ITI Veng a tiphur a, team ṭha zawka ngaih Chanmari Women's FC lakah chak inbeiseina an neih phah. Chutihrualin ITI Veng hian group stage-a Chanmari an hneh lohna hi 2-1 leh 1-0 chauh a nih avangin chak pawh ni se 'upset' han tih chiam tur chu a ni bik lo.

GSA ITI Veng tan PC Lalduhthlani chuan minute 34-naah goal awmchhun a khung a, Chanmari Women's FC-in an siphurh an sut thei lo. GSA ITI Veng hian final-a an hmachhawn tur Maubawk hi ṭum khat inhnehtawkpuiin league round hnuhnung berah 1-0 in an hneh a, champion thei an ni tih chu a chiang a ni.