UCL 2020 Final Rematch Bayern Munich hmaah Paris Saint Germain

Champions League nomawi kawl mektu Bayern Munich chuan zanin dar 12:30 hian Paris Saint Germain an mikhual dawn a, quarterfinal first leg inkhelah hian striker Robert Lewandowski a tel thei dawn lo.

Season hmasa khan team pahnih hian UCL nomawi an inchuh, German champion lamin 1-0 a hnehna changin nomawi an chawi. Kuminah title inchuh tur la ni chiah lo mah se final kalkawng a ni miau a, inkhel a hmuhnawm ang.

Thawnthu hlui
Arab sum hmanga siam len a nih hnua Paris Saint Germain duh leh awh ber chu Champions League nomawi a ni, tun thlengin an la nei thei rih lo. Season hmasa khan an ban phak maiah a inhung a, mahse tawnhriat ngah Bayern lakah an tlawm.

Lisbon khawpuia inkhel hmuhnawm takah Kingsley Coman-a'n chakna goal awmchhun a khung a nih kha. Coman hian, "Football ka khelh china ka hun tawn ropui ber," tiin a inzir chhuahna club laka chakna goal a khung changchang a sawi hial.

UCL final-a an chak loh hian PSG pawh na takin a nghawng. Ligue 1 season bul an ṭan tlai phah a, result an nei ṭha lo chhunzawm - manager Thomas Tuchel chungah pawh dawhtheihna an nei rei lo. German manager banin Mauricio Pochettino an ruai leh daih tawh.

Lewy awm lo
Nikum khan Ballon d'Or sem nise chuan Lionel Messi leh Cristiano Ronaldo te aiin, club tana nomawi chawi theih chawi kimtu Lewandowski chu buk rit zawk tura ngaih a ni a, mahse vanduai thlak takin hripui leng vangin an sem thei lo.

Poland international hian Ballon d'Or dawng lo mah se goal khung a bansan phah chuang lo, season kal laiah goal 42 teh meuh a khung leh tawh. Mahse, ram tana a feh chhuahna lamah a khup a hliam - zanin leh kar leha second leg an khelh hunah a inlan lo ang.

Lewy hmunruak hi luah thei an awm dawn lo, chutih rualin a tel dawn loh miau avangin a tel loa goal khung an zir a ngai miau si. Kar tawp khan Bundesliga lama an elpui RB Leipzig an hmachhawn a, midfielder Leon Goretzka goal hmangin an chak hram.

Hansi Flick-a'n tlarhma lama khel turin - Serge Gnabry, Leroy Sane leh Coman te a nei a, anni thlawp turin tawnhriat nei ṭha leh player huaisen ni bawk Thomas Muller an nei tel. Lille laka chak lo hlim PSG tan Lewy awm lohna team hi zuam ngawt chi an ni dawn chuang lo.

German manager Flick chuan, "Quarterfinal-ah team nem a hmachhawn theih loh. European team ṭha pariat chauh kan awm tawh, inkhel pahniha chet ṭhat a pawimawh ang," tiin PSG nen an inkhel dawn tih a hriattirh khan a lo sawi tawh a, zaninah a bul ṭan ṭhat a tum ang.

Neymar a buai?
Neymar thiamzia inhrilh nawn a ngai lo. Amaherawhchu, Neymar hi thiam viau mah se, 'Mahse' in a zui a ngai leh ṭhin. Brazilian forward awm hma lama PSG-in an chawi ṭhin - Ligue 1, French Cup leh League Cup bak an la chawi belh thei chuang lo.

Barcelona forward hlui hi hliam dam hlim a ni a, an match hnuhnung bera Lille an hneh loh ṭumin hnawhchhuah a ngai hial. Hliam vanga last 16 khel lo Neymar hian Bayern lakah pound maktaduai 200 man a nihna a lantir a hun tawh hle.

Neymar aimaha ven ngun ngai tur chu Kylian Mbappe a ni ang. Season kal laia league goal 20 khung tawhtu hian Barca tlarhnung a paldarh thei a, Munich khawpuiah pawh a tlangnel a rinawm - mual sir lama khel thiam Angel Di Maria an la nei tel bawk.

PSG hian Covid-19 vangin defender Alessandro Florenzi leh midfielder Marco Verrati te an chhawr thei dawn lo. Florenzi hmun ruakah Italian defender Thilo Kehrer a awm thei dawn a, Italy international Verrati a awm loh chuan Ander Herrera hmel kan hmuh a rinawm.

Florenzi chuan, "Season hmasa kan chak lohna kha na kan ti em em a, phuba lak kan chak. Tunah erawh kan chak lohna kha insiamṭhat nan kan hmang tawh a, chak duhna thinlung nen Bayern kan hmachhawn ang," tiin a sawi.

Poch a fimkhur
PSG manager Pochettino chuan, "Lewandowski awm loh vangin Bayern hmachhawn a awlsam phah ngawt dawn lo. European champion lai an ni a, season kal laiah team ṭha ber zinga mi an ni bawk," tiin German champion chu an striker awm lo mah se zuam chi an nih loh thu a sawi.

Poch chuan sawi zawmin, "Zahna thinlung nen Allianz Arena kan pan ang, chutih rualin semifinal luh tum chungin kan inkhel dawn a ni," a ti. Argentina manager hi UCL chawi tura beisei a ni a, a hmabak erawh a hautak chho hle.

Barcelona meuh an hneh theih avangin PSG hi Bayern lakah dah hniam ngawt bik a fuh lo mai thei. Amaherawhchu, an khingpui tur Bayern hian Flick kaihhruaina hnuaiah UCL match 16 an khel tawh a, tlawm an la nei lo - vawi 15 chakin, ṭum khat an inhnehtawk.

Bayern manager Flick chuan, "Player ṭha an inlan thei lo a nih chuan chanchin ṭha lo a ni. Mahse, football chu team game a ni a, goal vengtu aṭanga a khungtu thlengin inbuktawk taka awm a pawimawh ber," tiin a sawi.