North Korea inlan dawn lo

Tokyo Olympic-ah North Korea an tel dawn lo, infiamna khawmpui liana an tel dawn loh chhan hi Covid-19 an hlauh vang a ni a, hripui leng lakah an infiammite venhim an duh thu an sawi.

North Korea an inlan dawn loh avang hian South Korea nen inṭhian ṭhatna hun an neih tur chu a awm thei dawn ta lo tihna a ni. Kum 2018 Winter Olympic-ah khan, infiamna peng ṭhenkhatah chuan Korea ram pahnih hi puanzar pakhat hnuaiah an lo inlan dun tawh.

Kum 1988 khan North Korea hian Seoul khawpuia Olympic neih chu a hmang ve lo, a inlan loh chhan hi 'Cold War' vang a ni a, a hnu lamah chuan an inlan char char - kuminah an ṭhulh leh chiah tihna a ni. A tira ruahman lawk dan chuan Tokyo Olympic 2020 hi nikuma neih tur kha a ni. Mahse hripui leng vangin kum khatin an sawn tlai a, a hming pangngai pu chungin kumin July 23 hian an nei ṭan ang.

Sawn tlai ni mah se kuminah pawh hri leng hian harsatna a la siam reng tho. Japan mipui ngei pawh Olympic thlen leh thlen loh chungchangah an inlungrual vek thei lo, sorkar lam erawhin neih tlang ngei tumin hma an lak chhunzawm zel. Tun hnai mai pawh khan Japanese water polo team zinga pasarih chuan coronavirus an kai tih hmuhchhuah a ni a, hei vang hian Olympic inbuatsaihna an neih tur pawh an lo ṭhulh tawh a ni.