Texas Rangers-in entu an ngah

US Major League Baseball club Texas Rangers chuan nimin khan league match-ah Toronto Blue Jays an mikhual a, mipui 38,234-in inkhel hi a hmunah an en - Covid-19 hri a len hnua US-a a hmuna infiamna entu an tam ber ṭum a ni.

Texas governor Greg Abbott chuan thla hmasa khan, "Texas hi 100% a kan inhawn a hun tawh a ni," tiin Covid-19 khuahkhirhna dan an neihte chu an phelh thu a puang a, hei vang hian Venue Globe Life Field-a inkhel en thei zat bi tuk a ni lo.

US Centres for Disease Control and Prevention chuan mipui tam tak punkhawmna hun siam chu Covid-19 hri darh tir theitu hlauhawm tak a nih thu an sawi a, US president Joe Biden chuan Rangers-in mipui tana an stadium an hawng tur chu a dem thu a lo sawi tawh bawk.

Rangers hian inkhelh hma hian fan-te chuan inven nan an hmai an tuam tur thu an lo sawi tawh a, mahse video aṭanga a lan danin fans tam takin an hmai tuam loin inkhel hi an en a ni.

Arlington, Texas-a inkhelah hian Covid-19 vanga thite hriatrengna hun pawh hman a ni a, US-ah hian Covid-19 kai mi maktaduai 30 chuang awmin mi 550,000 dawnin an nunna an chan tawh bawk - khawvela Covid-19 hri kai leh thi tamna ber an ni hial.