City-in Haaland lei an tum lo?

Borussia Dortmund forward Erling Braut Haaland chu Manchester City-a Sergio Aguero hmun ruak luah tur anga sawi ni mah se, City boss Pep Guardiola chuan lei tumna an neih loh thu a sawi.

Pep chuan, "Club chuan player pakhat lei nana pound maktaduai 100 dawn sen hi tun thleng chuan a la tum rih lo. Football hi team game a ni a, player pakhat chauha innghat a ni lo," a ti.

Kum 20 mi Haaland hi Dortmund chuan pound maktaduai 128 an chhiar a, tun season inelna hrang hrangah match 32 khelin goal 33-a khung tawh a, assist vawi riat a nei bawk.

Pep chuan, "A kum zat ngaihtuahin Haaland hi striker ṭha tak a ni. Nakinah chuan kum nga emaw kum 10 atan team hmasawnpui kan duh chuan player pakhat manah pound maktaduai 100 chuang kan la seng mahna. Mahse, tunah chuan club, CEO leh Sporting Director-te pawhin player pakhata heti zat sen hi ṭul an la ti rih lo a ni," a ti.

City legend Aguero chuan season tawpa a contract zawh rualin City-a chhuahsan dawn a, Haaland hi kum 32 mi striker hmun ruak luah tur hian sawi rik a ni - Barcelona leh Real Madrid nen indawrna an kalpui bawk.

Manchester City hian player lei nan sum inren lo mah se Pep-a sawi angin pound maktaduai 100 man player lakluh an la nei lo a, July 2019-a Atletico Madrid aṭanga pound maktaduai 62.8-a Rodri an lei kha an club transfer record a ni.