Nets chakna Kyrie Irving

Hun tawp dawna Kyrie Irving-a 3 points neih hmangin Brooklyn Nets chuan New York Knicks 114-112 in an hneh a, season kal laiah NBA champion an tum ngam tih a takin an lantir chhunzawm.

Nimin zing regular season inkhelah Nets tan Irving-a'n point 40 ngawt a nei a, a point neih zingah hun tawp dawna basket a neih chu a pawimawh zual hle. Irving chuan, "Keimah chauh ka ni bik lo, team thawhrah a ni," a ti. Nets tan James Harden inlan mah se minute li chauh a khel hman, point pawh nei hman loin hliam vangin a chawlh a ngai. Kevin Durant la inlan thei lo bawk mah se Irving an neih avangin harsa takin hnehna an chang hram.

Season kal laiah Nets hian vawi 35 hnehna an chang tawh a, vawi 16 an tlawm thung; Eastern Conference table-ah hmahruaitu an ni mek. Pahnihna Philadelphia 76ers chuan ṭum 34 hnehna an chang ve tawh thung.

Inkhel dangah Dallas Mavericks chuan 111-103 in Utah Jazz an hneh a, tun hnaiah a zawnin vawi nga hnehna an chang ta. Devin Booker-a point 36 neih hmangin Phoenix Suns pawhin Houston Rockets 133-130 in an hneh a, Toronto Raptors pawh Washington Wizards lakah 103-101 in an chak.