Hammers beiseina siamtu Lingard

West Ham United-in Thawhṭanni zan khan Wolverhampton Wanderers 3-2 in an hneh a, Premier League-ah palinaah inhlangkaiin Jesse Lingard hoin season thara Champions League khelh beiseina an chhi nung zel. Inkhel dangah Everton leh Crystal Palace te 1-1 in an inhnehtawk.

Molineux Stadium-ah Hammers-in bul an ṭan ṭha a; first half-ah Lingard, Pablo Fornals leh Jarrod Bowen te hmangin goal an khung. Wolves-in Leander Dendoncker leh Fabio Silva te hmangin siphurh sut ṭhen mah se an tho chhuak thei lo.

Lingard 'Solo Goal'
Manchester United-a khelhna hmun chang lo Lingard-a'n theihna sang tak a nei tih West Ham tan a pholang zel. Molineux Stadium-ah Hammers-goal bawh a na nghal a, Michail Antonio-a'n goal a khung teuh nghal hle.

Minute rukna lekah Lingard-a'n halfway line thlen hma aṭangin a khalh ṭan a, Wolves player pathumin veng bawk mah se inrintawkna nen khalh zelin box chhung aṭangin a pet goal.

Lingard hian West Ham tana khelh hmasak berah goal hnih a khung nghal a, league match riat khel tawhin goal ruk a khung der tawh. Gareth Southgate pawhin Lingard hi England tana khel turin a ko leh tawh a, Euro C'ship-ah Three Lions tan a khelh phak ngei a rinawm ta hle.

Hammers manager David Moyes chuan, "Player-te hi an khelh ṭhat thu ka hrilh zen zen lo a, Lingard erawh a phu miau avangin a khelh ṭhat thu ka hrilh," tiin Lingard a fak.

A goal zel
Hammers an phur chhunzawm a, minute 14-naah Pablo Fornals-a'n goal hnihna a khung. He goal-ah pawh hian Lingard a inrawlh leh tho a, corner flag bul aṭanga a lakluh ṭhat vang a tih theih.

Minute 38-naah Jarrod Bowen-a'n Hammers goal thumna a khung a, Bowen siamsaktu hi Lingard tho a ni. English midfielder hian ṭha takin a khalh chhuak a, Wolves defender pathumin an hual hnuah Bowen a pe a, Hull City winger hlui hian ṭha zetin a pet goal.

Hammers-in goal thum an khung hnuah an tha an thlah a, Wolves goal bawh a na ve leh thung. Pedro Neto-a' goal ruakah a khung lo a, amaherawhchu first half tawp hmain siphurh an sut ṭhen. Mual vei lamah Adama Traore-a'n chak taka a lakluh hnuah ṭha zetin a cross a, minute 44-naah Leander Dendoncker-a'n chiang takin a tauh lut.

Wolves-in beiseina thar an nei a, minute 68-naah Neto ball fing chu Fabio Silva-a'n goal-ah a chantir a, mualneitu lamin siphurh nan hun ngah mah se goal dang an khung belh thei lo. Hammers-in 3-2 in hnehna an chang.

Beiseina chu
West Ham manager Moyes chuan, "Kar thum vel liam ta khan kan match khelh apiang zel kan ngaih pawimawh tur thu kan sawi a, chan tur emaw hloh tur emaw kan nei lo. Tunah erawh match riat khelh tur la awm chungin team ṭha ho karah kan awm a, palinaah kan awm mek," tiin Champions League khelh an inbeisei thu a sawi.

Hammers hian Leicester City, Newcastle United, Chelsea, Burnley, Everton, Brighton, West Brom leh Southampton te an la hmachhawn dawn a, an fixtures thlir hian season thara Champions League khelh an beisei hi a mak lo.