Barca ban phakah nomawi a inchhawp

Khelmual chhung leh pawn buainain a tuam vel avanga chanchin ngah tak Barcelona-in an buaina an chingfel mek. Khelmualah result ṭha an nei chho a, a pawn lam siam ṭha turin President thar Joan Laporta an nei ta bawk.

Thawhṭanni zan khan Barcelona hian champion zia an chhuah a, khel ṭha lo chungin an mikhual Real Valladolid chu 1-0 in an hneh. Catalan club hian La Liga hmahruaitu Atletico Madrid chu point khat chiahin an thlau ta. Barcelona goal awmchhun hi Ousmane Dembele-a‘n minute 90-naa a khung a ni a, mikhual team Valladolid tan chhanletna hun a awm tawh lo - Barca-in point thum hlu tak an hlawh chhuak.

Valladolid attacking midfielder Oscar Plano chu minute 79-naah hnawhchhuah a ni a, a tam zawka khel Barcelona-in vanneih nan an hmang.

Ṭang ta che u!
Messi-a‘n kar hmasaa Real Sociedad an hmachhawn ṭumin Barcelona tana inlan hnem ber record a siam a, Nou Camp-a Valladolid nen an inkhelh hmain Messi chawimawina hun hman a ni.

Mahse, Messi chawimawi zanah Barcelona khel a hmuhnawm lo a, Catalan club hian an theihna angin an khel chhuak lo - nipui huna a contract tawp tur Messi a lawm lo. Minute 45-a zo a, dressing room an pan laiin Messi a ang nasa hle - khelmual sira television microphone-in Argentine forward ṭawng ri hi a lo record fuh.

Messi hian, “Tihdan kan zawn a ngai. Theihtawp kan chhuah a ngai a, kan theih ang anga hnehna kan chan a ṭul. Kan game kan tih ran a ngai a, a nih loh chuan kan buai mai ang,” a ti.

Minute 45 chu
Nou Camp-a inkhel ṭantir lam chu Valladolid hian an thunun zawk ang hiala sawi theih a ni a, inkhel ṭantir lam minute 25 chhungin mikhual team hian vawi li zet shot an nei hman.

Valladolid tan Kenan Kodro chu chance nei duhawm ber a ni a, mahse, minute kuanaa Saidy Janko-a cross a tauh chuan crossbar a per - Roque Mesa chuan a hun ṭha neih vawi hnih ngawt a chhawr thei lo bawk a, mikhual team an inthlahrung lo.

Barcelona-in hun ṭha nei lo an ni bik lo. Messi-a‘n freekick a chhawr ṭangkai thei lo a, Dembele-a‘n a chance neih a tauh over a, Messi tana a siamsak Argentine forward-in a shot chu Valladolid midfielder Rubén Alcaraz chuan a lo dang hman bawk. 

Khelmual sirah lungawi lo takin coach Ronald Koeman a lo ding a, a team-in hnehna an chan zawh loh chuan La Liga champion-na hun ṭha an bawhpelh dawn tih a hai lo.

Formation thlak
Koeman-a lungawi lo a, chutihrual chuan Barca khelh ṭhat loh chhana puh tur an awm a nih chuan 3-4-2-1 formation hmanga a naute khelhtirtu Dutch coach hi a ni ang.

Dutch midfielder ṭha mi Frenkie De Jong chu centre back-ah chhawr a ni a, Oscar Mingueza leh Clement Lenglet-te nen an ding ho. Midfield laiah Busquets leh Pedri awmin mual sir aṭangin Sergino Dest leh Jordi Alba-ten an thlawp. Tlarhmaah Dembele a mal tlat a, a hnung chiahah Messi leh Antoine Griezmann an awm. Mahse, Koeman-a‘n a formation hman sual a hai lo a, second half-ah a full back pahnih pawt letin Messi leh Griezmann an tawlh hma hret.

Tlarhnung laia khelhtir De Jong pawh a tawlh hma a, 3-4-2-1 aṭangin 4-3-3 ah Barcelona an lut a, Catalan club hi second half-ah an hlauhawm sawt.

A tawpah vanneihna
Barca-in formation thlak an chhawr nghal dawn niin a lang hman a, mahse, tlarhma player pathumten ball an inpek kual hnua Dembele shot chu dansak a ni - a per lehlam Griezmann-a‘n a tauh lut thei lo a, Valladolid an him.

Messi-a‘n freekick hmangin chance a nei leh a, mahse, ṭang tura a naute fuihtu hian goal-a zawng hmu thei bik lo - Valladolid tan Barca B team keeper hlui Jordi Masip chuan si ban a nghak a, chetsual a tum lo. Hun tawp nan minute 11 chiah a awm tawh tihah Dembele bawk kan hmu leh a, Plano chuan hnung lam aṭangin French forward tlan lai hi a kalh tlu a, red card pek a ni.

Team pahnih hi 0-0 a an ṭin mai dawna a lan hnuah Dembele-a‘n minute 90-naah Barca a chhanhim ta nge nge a, inkhela goal awmchhun a khung - hun a tawp zui a, Barca champion beiseina a nung zel.

Barca & harhna
Barcelona-in hnehna an chan avangin league champion beiseina a sang ta viau a, April 10 zanah El Clasico khel turin Real Madrid an lenchilh zui ang - a ngaihnawm dawn.

Catalan club hian December 5, 2020-a Cadiz an ngam loh khan La Liga hmahruaitu Atletico chu point 12 ngawtin an thlau a, tunah erawh an inkarah point khat chiah a awm ta! Barca hian Cadiz an ngam loh hnuah hian league match 17 an khel leh tawh a, vawi thum draw result neiin vawi 14 an chak - kum 2021-a European top five league-a tlawm la nei lo awmchhun an ni.

Koeman erawh first half-a an khelh danah a lawm lo a, Dutch coach chuan, “Kan nawr na tawk lo a, game kan thunun hek lo. A tir aṭang khan Barca team chau tak ka hmu a ni,” a ti a, hetihrual hian hnehna an chang thei tih an pholan avanga a lawm thu a sawi bawk.