Chelsea khingpui tur FC Porto

Champions League quarterfinal-ah zanin dar 12:30 hian Chelsea-in Ramon Sanchez Pizjuan, Sevilla-ah Porto an hmachhawn dawn. Thomas Tuchel-a hote hi kartawp inkhelah West Brom hmachhawnin 5-2 zetin an mualpho a, Portuguese club ṭha lakah hian insiamṭhat an tum dawn a ni.

Seville-ah daih!
Covid-19 vangin Chelsea leh Porto te inkhel tur first leg leh second leg hi Ramon Sanchez Pizjuan, Sevilla-ah khelh ve ve a ni dawn. First leg hi Porto tan home match a ni ang a, second leg hi Chelsea tan home match a ni thung ang.

British sorkar-in coronavirus vangin ram ṭhenkhat tlawh turin khuahkhirhna dan a siam a, chung zingah chuan Portugal pawh hi an tel. Sorkar dan avangin Blues tan Porto hi an muala an hmachhawn a rem lo a, chutiang chiahin Porto tan pawh inkhelh hma ni 10 chhung in quarantine a ngaih avangin Stamford Bridge-ah khelh theih a ni bik lo.

Portugal sorkar chuan Covid-19 vangin United Kingdom ram chhung aṭanga thlawhtheihna thlawh luh a phal bik lo a, UK aṭanga an rama lut reng reng chu ni 14 tal an inkhunghran a ngai bawk. Hemi a nih avang hian club pahnih tan an muala inkhelh a rem lo a, Spain-ah an inkhelh a ṭul phah a ni.

Ramon Sanchez Pizjuan-ah hian tun season-ah Chelsea an inlan tawh a, nikum December khan UCL group stage-ah Sevilla 4-0 in an hneh a ni.

Juve hnehtu
FC Porto hian quarterfinal lut turin Juventus an hneh a, away goal rule hmanga hneh ni mah se Italian champion hneh thei an nih avangin an ṭha tawk tih a chiang. Juve hian European champion nih an duh vangin Cristiano Ronaldo an lalut a, Portuguese club hian last 16-ah an beiseina an ti tawp.

Chelsea manager Thomas Tuchel chuan, “Inkhel pahniha Porto khelh dan aṭanga teh khan chak phu zawk an ni. Goal venghim turin an bet ṭhap a, chutihrualin ball chan tumin an press thiam a; goal venhim leh pressing kha an chawhpawlh ṭha hle. Porto hi dah hniam theih an ni lo,“ tiin a khingpui tur a fak.

Porto midfielder Mateus Uribe pawhin, “Vanneih vanga quarterfinal lut kan ni lo. Chelsea hi team ṭha tak ni mah se Porto kan ni a, chona hmachhawn turin kan inpeih a ni,“ tiin a sawi.

Amaherawhchu Porto hi an ram league Premiera Liga-ah pahnihna a ni mek a, Sporting Lisbon an tluk lo. Portuguese club hian hrem vangin goal khung thei pahnih Sérgio Oliveira leh Mehdi Taremi te an chhawr thei dawn lo. Portuguese forward Oliveira hian tun season-ah goal 17 a khung tawh a, Iranian midfielder Taremi-a‘n goal 15 a khung ve bawk.

Chelsea hi...
Thomas Tuchel-a hnuaiah Chelsea-in match 15-naah hneh loh an tawng ta a, club lian tak tak hmachhawn tawh mah se an hneh loh erawh relegation zone-a awm West Brom an ni daih. Blues hi an chak lo satliah lo a, goal nga zet an chhuah avangin an inrintawkna thlengin a nghawng phak a rinawm.

Blues buaina belhchhahtu chu goal khung thei bik player an nei lo hi a ni a, Timo Werner-a‘n English club a pan hnuah pet goal dan a theihnghilh ta emaw tih mai turin goal hmaah a talbuai ṭhin. Chutihrualin tawnhriat nei ṭha Olivier Giroud an kawl a, World Cup nomawi chawi tawh striker hi inkhel boruak sangah a pawimawh ang.

Thomas Tuchel-a‘n Baggies an hneh loh zawhah team anga mawh an phur thu a sawi a, insiamṭha tur erawh chuan German manager hi a pawimawh dawn. PSG manager hlui Tuchel-a‘n attacking game a khelh a rinawm a, player thlan tur a ngah bawk avangin Porto an hneh ngei an beisei dawn.