Tualchhung Cricket Kulikawn an chak chiang

Nimin khan Kulikawn chuan run 60 zetin Zemabawk Pitchers lakah hnehna an chang. Mahuma Memorial 1st Division Screening Tournament khelh laiah Kulikawn hian match nga an khelh aṭangin vawi li hnehna an chang ta.

Suaka Cricket Ground, Sihhmuia inkhelah Zemabawk Pitchers hi ṭhum vawrah vannei zawkin vawm hmasak an thlang a, an thlang sual niin a lang. Kulikawn lamin over 50 chhunga run 278 zet siamin player pali chauh an thi.

Player of the Match atana thlan Parvez Ahmed-a'n ball 68 a hmachhawn aṭangin run 87 a vaw chhuak thei a, captain Michael Lalremkima leh Vikash Kumar ten run 59 ve ve siamin an khingpui tan target sang tawk tak an hnutchhiah. Zemabawk lamin target umphak ngei an tum a, mahse player 10 zingah run 50 siam tling thei an awm lo. Over 48.5 chhunga run 218 siamin an thi kim a, an tum ram an thleng zo lo.

Vawiin hian a hmun ngaiah inelna neih chhunzawm a ni dawn. Ramhlun Venglai laka chak lo hlim Chhinga Veng leh RVL hnehtu Zarkawt Lords an inkhel ang, team pahnih hi final luh beisei ngam an nih avangin a hmuhnawm dawn. Durtlang khelmual lamah pawh Khaled Memorial 2nd Division Screening Tournament khelh chhunzawm zel a ni a, vawiin hian league round 7 khelh a ni ang. Ruahman lawk dan chuan inelna hi April 10, Inrinniah a hmawr bawk a ni dawn.