Ligue 1 champion PSG

Cathedrale Notre-Dame de Paris kang vanga France khawpui a indawmkun laiin lawmna tur an tawng ve leh ta. Inrinni zan khan he khawpuia inbengbel club zinga lian leh changtlung ber Paris St-Germain chu a vawi riat nan Ligue 1 champion an ni.

Paris St-Germain hi AS Monaco nen an inkhelh hmain an champion tih hi a chiang tawh, anmahni hnaih bertu Lille chu Toulouse nen goal awm loa an inhnehtawk avangin PSG hi umphak theih an ni tawh lo a ni.

Champion chiang tawh tih inhresa mah se Thomas Tuchel-a nauten theihtawp an chhuah tho. Rawlthar duhawm Kylian Mbappe-a'n a club hlui lakah hattrick siamin 3-1 in hnehna a chanpui a, hun tawp dawna midfielder Aleksandr Golovin goal khungin Monaco mualpho tur a hliahkhuh zo lo.

Notre Dame
April 15 khan Paris khawpuia Catholic cathedral hmingthang tak Notre Dame chu a kang a, kum 1163 aṭanga sak ṭan tawh chunga chhiatna thleng hian France ram mai ni loin khawvel a deng chhuak chiang hle.

Paris St-Germain chuan Monaco nen an inkhelh ṭum hian jersey hnung lama an hming ziah ṭhin aiah 'Notre Dame' tih an chhu kai. Inkhelh ṭan hmain Mbappe chuan kum 850 vela upa Gothic style a sak biak-in kang ṭhelhtu mi 400 vel leh an chhungte chibai a buk a, stadium chhung boruak chu lawmna leh lungngaihnain a tuam vel.

Stadium chhunga mipui ṭhutna hmunah chuan lian zet maiin, Paris khawpui motto 'Fluctuat nec mergitur' tih inziahna an tarlang a, hei hi 'Thlipuiin nuai mah se, a pil lo ang' tihna a ni - an chhiattawhna avangin tluk chhiat an tum lo a, huaisen takin thawhchhuah ngei an tum.

Hei le Mbappe
Kylian Mbappe-a'n 2016-2017 season khan AS Monaco chu Ligue 1 nomawi a chawipui bakah Champions League semifinal a luhpui, club lian dang tam takin an hnena khel tura an duh laiin an ram khawpui club PSG a pan.

Inrinni zan khan kum 20 mi hian a club hlui lakah zahngaihna a lantir lo. Minute 15-na lekah counter attack aṭangin goal hmahruai a khung a, chawlhlawk hmain Dani Alves ball pek a khung bakah, Brazilian defender hian a goal thumna tur a siamsak leh bawk.

French rawlthar duhawm Mbappe-a'n tun season league match 27 a khelh aṭangin goal 30 a khung tawh a, Ligue 1 season khat chhunga goal 30 khung tling thei naupang ber a ni. PSG an champion zan hian January thla hnua a vawi khat nan Neymar chu a inkhel ve leh thei tawh.

PSG-ah cham dawn
Mbappe ball pet thiamna hi an ramah chauha lar a ni lo, khawvel huap a ni. Club tana hlawhtlinna a chan bakah nikum khan World Cup-ah France a champion pui tawh bawk. Inelna lian leh boruak sangah pawh a puitling tawh tih a chiang - European club lian dang te awh rawn a ni mek.

'An player duh zawng apiang hlah ngai lo' ang maia sawi ṭhin Real Madrid chu thawm nei ring an ni. Spanish club lian hian French manager Zinedine Zidane an rawih nawn leh hnuah indinthar an tum dawn a, an player duh zingah Mbappe hi a tel nia sawi thawm a lian hle.

Mahse, Mbappe chuan, "PSG-ah ka cham ang, he hmunah hian hmathlir thui tak kan nei a ni. Real Madrid-a Zizou a kir hi ka lawm a, nidang ang bawkin a naute a khelhtir lai chu ngaisang tak chungin ka lo en leh dawn a ni," tiin a sawi.

Hmabak
PSG hian tun hnai season sarih chhunga a vawi sarih nan league nomawi an chawi thei a, 2017 khan AS Monaco-in an chhuhsak zauh tih mai loh chu an chungnung hle. Inrinni zan hian Stade Rennais nen French Cup an khel zui leh ang.

Paris club manager Thomas Tuchel chuan, "Inelna zawng zawnga champion theih hi duhthusam a ni. Mahse, inelna lian Champions League nomawi chawi tur chuan club ropui Juventus pawhin kum 20 chhung an nghah a ngai. Kan thil tumah kan la chiang reng a, kartawpa Rennes nen kan inkhelh hunah hnehna chan ngei kan tum ang," a ti.

Arab sum hmanga siam len PSG hian Ligue 1 chu an thunun. Mahse, an duh ber UCL-ah erawh an la hlawhtling thei lo. Pound maktaduai 200 zet senga an lakluh Neymar chu hliam vangin a buai fo a, khawvel footballer manto ber hi last 16-a Manchester United an hneh loh ṭum pawhin a inlan thei lo.

April 21, Pathianni zan
Nantes 3 - 2 Amiens SC
Toulouse 0 - 0 Lille
Reims 0 - 2 Saint-Etienne
PSG 3 - 1 Monaco