Monte Carlo lal thar Fabio Fognini

Fabio Fognini chuan Pathianni zan khan Dusan Lajovic chu 6-3, 6-4 a hnehin Monte Carlo Masters nomawi a chawi a, Italian tlangval zingah 1968 hnu lama he inelna bika champion thei hmasa ber niin ATP Masters 1000 title a lak vawi khatna a ni nghal bawk.

Kum 31 mi Fognini hian Serbian tlangval Lajovic hneh tur hian darkar khat leh minute 38 chhung hun a mamawh. Tun season chhunga nomawi a chawi hmasak ber niin tennis a khelh hun chhungin title pakua a kawl khawm ve ta.

Monte Carlo Masters an khelh hma khan Fognini hi rinkai a ni phak lo hle, a match hnuhnung pangaah a chak lo chungin a inlan. Mahse, inelna takah chuan Alexander Zverev leh Borna Coric te a hneh hnuah vawi 11 zet champion tawh Rafael Nadal chu a hneh thei hial a ni.

Tun kar world ranking chhuak thara 12-na ni tur Fognini chuan, "Tennis ka khelh tirh aṭang khan engtik niah emaw chuan inelna lianah ka la champion ve ngei ang tih hi ka ngaihtuah ṭhin. Keimah ang bawkin player zawng zawng duhthusam a nih ve ngei pawh ka ring, tunah chuan chu hun chu a lo thleng ve ta," a ti.

Italian tlangval Fognini chuan clay court inelna lian ber French Open thlir nghalin, "Roland Garros-a hlawhtlinna chan theih chu thil châkawm ber pakhat a ni. Mahse, season dang ang bawkin Rafa chu rinkai a ni leh dawn," a ti. Monte Carlo-ah Nadal hneh mah se Spanish player hi a la dahsang hle.