Vawiin aṭangin L. Hrangnawna Memorial 33rd Mizoram Open Tennis Championships

Mizoram chhunga tennis inelna lian ber zinga mi L. Hrangnawna Memorial 33rd Mizoram Open Tennis Championships chu vawiin aṭangin Aizawl Tennis Club-ah khelh ṭan a ni dawn a, April 26 thleng a awh ang.

Inelna hi category pasarih - men’s singles, women’s singles, men’s doubles, under 16 (boys), under 16 (girls), 35+ singles leh 50+ doubles-ah te neih a ni dawn a, Mizoram chhunga player ṭha an fuan kim viau tura ngaih a ni. Mizoram Open vawi 33 hi Mizoram Tennis Association buatsaih a ni a, L. Hrangnawna, IPS (retd) (L) chhungten an sponsor a, inkhel en man a awm dawn lo.

Inelna hi kum 1975 khan Lieutenant Governor’s Trophy tia a hming vuahin khelh ṭan a ni a, kum 1987 aṭangin Mizoram Open Tennis Championships tiha a hming thlak niin tun ṭum hi Mizoram Open hming a put hnua a vawi 33-na a ni.

Men’s singles champion hmasa ber chu Pahnianga, Aizawl Tennis Club a ni a, Lunglei Tennis Club player Vanlalmawia hnehin a champion. Men’s doubles-ah ZD Chhuanvawra leh Vanlalmawia, Lunglei Tennis Club ten Ch. Rosanga leh Pahnianga, Aizawl Tennis Club te ṭang dun hnehin state kan nih hnua men’s doubles trophy hmasa ber an chawi a ni.

Kum 1988 aṭangin veterans 40+ khelh ṭan a ni a, Sapliana Chongthu, Lunglei Tennis Club chuan K. Lalchhunga, Aizawl Tennis Club hnehin veteran lawmman hmasa ber a dawng.