Ole Gunnar Solskjaer-a'n ngaihdam a dil
Manchester United chuan Pathianni zan khan Goodison Park an tlawh a, Everton lakah 4-0 zeta an mualpho avangin manager Ole Gunnar Solskjaer chuan club ṭantute lakah ngaihdam a dil.
United hi an match hnuhnung panga khualmuala khelhah an chak lo vek a, an khelh danah lawmna tur nei lo mah se Champions League khelhna hmun inchuha an elpui Arsenal-in Emirates Stadium-ah Crystal Palace an hneh loh avangin inhnemna tur erawh an nei thung.
Zahna Kawn
Barcelona laka tlawm hlim United-in intuai thar an mamawh a, Goodison Park-ah point thum hlawhchhuah inbeisei mah se chak tur zia an chhuah hlawl lo.
Everton-in Richarlison goal mawi hmanga bul ṭanin Gylfi Sigurdsson, Lucas Digne leh substitute Theo Walcott ten goal khat ṭheuh an khung.
Jose Mourinho chhuah hnua che ṭha Paul Pogba leh Romelu Lukaku te chu Toffees laka khel chhe zinga langsar zual an ni a, Lionel Messi goal khung tur holam taka chhuahtu keeper David de Gea pawh a rintlak tluan tling lo hle.
United boss Ole Gunnar Solskjaer chuan, "Ṭan phat aṭang khan engkim a dik lo. Min ṭantute chiah kha United nihna lantirtu an ni a, an chungah ngaihdam kan dil e. Kan khel ṭha hlawl lo a, Manchester United team ni tlak kan ni lo," tiin an khelh dan chu zahthlak a ti hle.
Gunners tlarhnung a pawp
Arsenal tan Emirates Stadium chu innghahna tling a ni a, Crystal Palace an hmachhawn hma hian tun season league bikah Manchester City chiah an hneh lo.
Amaherawhchu Pathianni zanah erawh an tlarhnung pawp vangin an mualpho a, league match 10 a zawna an chakna hmunah Palace 3-2 in an hneh lo.
Eagles hian Christian Benteke (17') hmangin goal an khung hmasa a, Arsenal-in Mesut Ozil (47') hmangin sut mah se Shkodran Mustafi tihsual vangin mikhualin Wilfried Zaha (61') hmangin hma an hruai nawn. Cyrstal Palace hian James McArthur hmangin minute 69-naah an khung belh a, Gunners-in Pierre-Emerick Aubameyang hmangin minute 77-naah siphurh sut ṭhen mah se goal dang an khung belh thei tawh lo.
UCL khelh inchuh
Champions League khelh tuma inum Tottenham, Arsenal leh United te kartawpah an chak lo vek a, nizan khan Chelsea an inkhel a, result kan hre hman lo.
Tottenham hian zanin hian tla thei dinhmuna ding Brighton & Hove Albion an hmachhawn dawn a, an chak zo lo a nih chuan Champions League semifinal hial thleng mah se chhinchhiah zui tlak loin season an la khar ve thei tho.
Mipui ngaihven erawh naktuk zana inkhel tur Manchester Derby a ni a, nomawi chawi tur hriltu inkhel a nih nghal avangin Liverpool ṭantuten ring ngam lo chungin an hmelma United chungah beiseina sang tak an nei ang.