Fed Cup final-ah Australia leh France

Ram leh ram hmeichhe tennis team hmanga inelna Fed Cup final khel tur a hriat ta. Australia chuan kum 26 chhunga a vawi khat nan semifinal an paltlang a, nomawi chawi tur chuan France an hneh a ngai dawn.

Pathianni zan Brisbane-a inkhelah Australia hian 3-2 in Belarus an hneh. Best of five hmanga inelna neih niin, ram pahnih ten 2-2 a an inhnehtawk hnuah doubles khelh leh a ni a, Ashleigh Barty leh Samantha Stosur te ṭangdun chuan Victoria Azarenka leh Aryna Sabalenka te 7-5, 3-6, 6-2 a hnehin an ram an champion pui a ni.

Final hi November thlaah daih khelh a ni dawn a, Belarus hnehtu Australia hian France an lo mikhual ang. Semifinal lehlamah France hian Romania chu 3-2 bawkin an lo hneh ve bawk a ni.

Romania tan hian French Open champion lai Simona Halep chuan singles match pahnihah hnehna chang mah se a ṭhiante puihna a dawng ṭha tawk lo a, quarterfinal-a champion lai Czech Republic an hneh ṭum angin an vannei nawn tawh lo.