Cardiff khawpuiah Liverpool beiseina a vul
Liverpool tan Premier League nomawi beiseina a vul zel - Reds hian Pathianni zan khan Cardiff City chu 2-0 in an hneh a, table chung berah an awm leh ta.
Merseyside club tan Georginio Wijnaldum leh James Milner (penalty) te chuan goal khat ve ve an khung a, mualneitu Cardiff-in a chhanletna tur an nei lo. Reds hian point hnihin Manchester City an tlanpel a, match khatin an khel tam zawk thung. Liverpool-in match thum chiah khelh tur an nei tawh a, City-in match li an la nei thung.
Liverpool beiseina leh innghahna chu Manchester United an ni daih a, an hmelma kumhlun club hian Nilaini zanah City an mikhual dawn - he inkhel result hian Premier League champion tur thui takin a hril ang.
Hman leh tun
Liverpool-in Cardiff an tlawh hnuhnung ber chu 2014 khan a ni a, hetih hunlaia Ole Gunnar Solskjaer-a enkawl team hi 6-3 in an sawp a, Luis Suarez chuan hattrick a siam.
Kum 2014-a an inhmachhawn ṭum pawh hian tun ang thoin Cardiff hi tla thei dinhmunah an ding a, Liverpool hi Manchester City nen bawk champion inchuh an ni bawk. Liverpool tan 2013/14 season hi Suarez leh Daniel Sturridge vul lai a ni a, tlarhma lamah an ngaihtuahawm loh. Mahse, tlarhnung lam erawh a pawp hret a, goal 101 zet an khung chungin an lamah goal 50 a lut.
Tun season-ah Reds leh City an inum a, Pathianni zan an intawn hian Cardiff chu tlak hlauhawmah an awm mek - thil danglam erawh Reds tlarhnung a phui tawh hi a ni a, goal an khung theih lawk loh pawhin hlauhthawnna tur a awm tawh lo.
Hei le goal
Liverpool hian tun season-a league match 35 an khelhah goal 20 chiah an la chhuah - Cardiff lakah pawh goal khung thei lawk lo mah se an tlarhnung a phui miau a, an hlauthawng lo.
Premier League-a an match hnuhnung pangaa second half goal hmanga chak Reds hian Pathianni zanah pawh second half-ah bawk goal an khung - goal hmasa ber lut tur hian minute 57 an nghah thlen a ngai. Trent Alexander-Arnold-a corner aṭanga ball kal chu vengtu nei lo Georginio Wijnaldum chuan hnai takah chiang zetin a hlap lut a, Bluebirds keeper Neil Etheridge tan dan theih a ni lo.
Liverpool tan Mohamed Salah chuan goal khung lo mah se minute 81-naah penalty a hlawh chhuak a, James Milner chuan harsatna awm loa goal-ah chantirin 2-0 in an chak.
Zuam sual
Cardiff boss Neil Warnock-a'n, "Eng team mah kan hlau lo," tiin sawi mah se Liverpool meuh ngam tur chuan Cardiff City an la ṭha tawk lo tih a lang a, tla thei dinhmunah an ding mek.
Liverpool-in goal hnih an khung bakah tlarhmaa an chhuanvawr pathum Salah, Sadio Mane leh Roberto Firmino te chuan goal khung theihna chance an neih an chhawr thei lo vek a, Jordan Henderson chuan holam takin a hlah bawk. Cardiff hian hun duhawm nei lo an ni bik lo. Captain Sean Morrison chuan goal ruak chauh a hmachhawn chungin ball a tauh fuh tawk lo a, an hun ṭha neih a khawhral.
Welsh club manager Warnock chuan, "Chelsea laka fair lo taka kan tlawm kha ka la theihnghilh thei lo a, khatiang em ema mihring inhnuaichhiahna kha ka la hmu ngai lo. Fan-ten fak an phu a, ka theihna zawng zawng ka hlan tih an hria a ni," tiin a sawi.
