Nomawi aiah fans - Jurgen Klopp

Liverpool boss Jurgen Klopp-a'n nomawi pawimawh zia a hai lo. Mahse, German coach hian match thum chauh khelh tur an neih tawhah pressure neih a duh lo a, nomawi aia fans an ngaihpawimawh thu a sawi!

Klopp chuan, "Nomawi chiah i ngaihtuah a nih chuan i dik tawk lo tihna a ni. Football-a hnehna chan zel kan duh chhan hi chu fan-te nena kan zinkawng nuam kan tih vang a ni," a ti. Liverpool hian point 88 an nei tawh a, Premier League awm hnua season khata point an hmuh hnem ber a ni - season dang ang chu ni se champion pui tham point an hmu tawh.

Klopp chuan, "A tawpah point engzat nge kan neih kan thlir ang a, min thlen chin kan la en leh bawk ang chu. He club hrim hrim hian minti phur a, team dang inkhelin minti buai lo," a ti. Liverpool hian Zirtawpni zanah Huddersfield an mikhual dawn a, May 1-ah Champions League semifinal khel turin Barcelona an lenchilh zui ang.

Klopp chuan, "Barcelona-in kan ngaihtuahna an luah leh luah loh min zawt mai thei a, mahse Huddersfield chiah kan ngaihtuah dawn a ni," tiin an hmabak zel an ngaihtuah thu a sawi. German coach hian Manchester derby chungchang sawi nghalin, "United nen kan inhmachhawn lai kha chuan an dinhmun a ṭha a, chuti chung chuan 0-0 in a tawp," a ti a, City dinhmun ṭhat thu a sawi.

Klopp chuan, "United hian City lakah point hlawh chhuak pawh ni se lo lawm tur kan ni lo, derby zawhah hian match kan la nei ve dawn tho a, kan khelh tur chiah kan ngaihtuah ang," a ti a, City result hmanga intihbuai a tum lo.