Tlai dar 4:30-ah MFA Women's League final

Mizoram Football Association buatsaih Women's League hmawr bawkna chu vawiin tlai dar 4:30 hian Lammualah neih a ni dawn a, GSA ITI Veng leh Maubawk Women's FC te an inhmachhawn ang.

GSA ITI Veng leh Maubawk te hi league round-ah ṭum hnih an inhmachhawn a, an inkhelh hmasak ṭumin goal awm loin an inhnehtawk. League round tawp berah erawh ITI Vengin captain Lallungmuani goal hmangin Maubawk 1-0 in an hneh.

Maubawkin an elpui ITI Veng an hneh loh avangin tum châkawm loh ber Vakiria FC an hmachhawn a ngaih phah a, chuti chung chuan final beisei ngamin 2-1 in league round pakhatna Vakiria FC an hneh a, an tum ram an thleng ta tho.

GSA ITI Veng pawhin Chanmari Women's FC chu 1-0 in an hneh ve bawk. Player neih dan thlira team ṭha pahnihin final thleng zo lo mah se champion duha tuihal veng pahnih ITI Veng leh Maubawk ten nomawi an inchuh dawn avangin a tawp kharna khelmual chhung leh pawnah boruak a ṭha khawp ang.

ITI Veng manager Lalropuia chuan, "Maubawk nen hian kan inhre ṭha a, official te pawh kan inpawh hle. Kan intluk tawk a, chutihrualin veng mipui puihna nen hnehna kan chan ngei ka ring," tiin champion a inbeisei hle.

Maubawk manager Lalawmawii chuan, "Kan squad a chhah tawk lo a, chuti chung chuan Vakiria FC kan hneh thei a. Player-te hian an theihna zawng zawnga an khelh chuan ITI Veng hi kan hneh theih lohna chhan tur a awm lo a, khelmuala inlan apiangte rilru leh tih takzeta an khelh a ṭul a ni," tiin Vanglaini a hrilh.

ITI Veng tan tun inelnaa goal thum khung tawh PC Lalduhthlani chu ṭum dang ang bawkin a pawimawh dawn a, Maubawk lamah goal li khung tawhtu Zairemmawii chu an chakna thahrui a ni ang.