Mizoram hmeichhe team che ṭha

Hero Junior Girl's National Football Championship 2019-ah Mizoram chuan an match hmasa bera Punjab 9-0 zeta an sawp hnuin nimin khan Andhra Pradesh 7-0 in an sawp. Inelna hi Kolhapur, Maharashtra-ah neih a ni.

Mizoram tan Chanmari WFC player Lalrinmuani chuan hattrick a siam a, Darlawn tleirawl hian Punjab an hneh ṭumin hattrick a siam tawh bawk. Armed Veng South tleirawl Gladys Zonunsangi (Maubawk WFC) chuan goal hnih khungin Luangmual tleirawl Ruth Vanlalpeki (GSA ITI Veng) leh Bukpui tleirawl Lalnunsiami (Vakiria FC) ten goal khat ve ve an khung bawk.

Mizoram hi group H-ah Andhra Pradesh, Punjab leh Kerala nen an awm ho a, group khat aṭangin pakhat chauhin quarterfinal an lut dawn. Kerala hian Andhra Pradesh (6-0) leh Punjab (3-0) an hneh ve ve a, Mizoram nen April 25, zing dar 9:30-ah quarterfinal lut tur an zawng dawn. Coach Vanlalpeka kaihhruai Mizoram hian goal difference an neih ṭhat zawk avangin draw chauh pawhin knockout stage an lut thei ang.

Mizoram manager Mary Lalawmpuii (Lakuri) chuan, "Kan chak tam viau angin a lang na a, inkhelh chhung zawngin kan thin a phu dep dep a, thin thiin kan awm thei lo. Andhra lam kha an footwork a ṭha a, an rang si a, kan naute pawh an talbuai phah hle. Goal aṭanga teh erawh chuan team ṭha zawk kan ni a, match hmasa lam ang thoin referee thutluknaah kan lawm lo a, offside bakah thutlukna pawimawh dangah kan beisei loh ang zawnga a ham avangin goal tam zawk kan khung loh phah a ni," tiin Vanglaini a hrilh.

April 21, Pathianni
Mizoram 9 - 0 Punjab
MIZ : Lalrinmuani 6', 41', 45'; Lalnunsiami 62', 87'; Lalhlupuii Varte 10'; K. Ngopawdi 45+2'; Nancy Lalhlimpuii 57'; Vanlalnghaki 65'

April 23, Thawhlehni
Andhra Pradesh 0 - 7 Mizoram
MIZ : Lalrinmuani 26', 38', 75'; Gladys Zonunsangi 37', 45+1'; Ruth Vanlalpeki 46'; Lalnunsiami 87'