Santosh Trophy-ah Services an champion

Santosh Trophy final round chu April 8-21 chhung khan Ludhiana, Punjab-ah khelh a ni a, Mizo telna Services chuan final-ah inelna thlengtu Punjab 1-0 a hnehin an champion.

Football hmanga state leh state inelna sang ber Santosh Trophy champion team Services-ah hian Samthang tlangval PC Lallawmkima leh Bethlehem tlangval Jonathan Lalmuansanga te an tel a, goalkeeping coach Stephan Tawnthansanga chu Muthi khua a ni bawk. Hetihlai hian champion ngun ber West Bengal leh Mizoram te erawhin qualifying round an paltlang zo lo a, final round-ah an inlan lo.

Samthang tlangval
Samthang tlangval PC Lallawmkima kaihhruaina hnuaiah Army Green-in kum 2016 khan Durand Cup an chawi a. India ram khawpui Delhi-a inelna neihah hian Mizo club ṭha Aizawl FC bakah I League aṭanga Mizo hmelhriat Neroca, DSK Shivajians, Dempo leh Real Kashmir te an tel avangin an nomawi hi sawi nep theih a ni lo.

Hemi ṭum hian Army Green captain PC-a chuan, "Sports quota-a sipai zawm ka ni lo a, sipai intlar dan pangngai aṭanga lut ka ni. Ka vanneih zarah tun dinhmun hi ka thleng chho. Pa ka nei tawh lo a, ka nu (Thanpuii Sailo) in bang loin ka tan min ṭawngṭai sak ṭhin vanga tun dinhmun thleng thei ka ni," tiin a football career inṭan dan Vanglaini a hrilh.

Army Green hian Durand Cup semifinal-ah Aizawl FC an hneh a, nikum khan NM Gupta final-ah Mizoram chu Silchar-ah an hneh leh a, hemi ṭum pawh hian PC-a hi player pawimawh a ni.

Tun ṭuma Santosh Trophy an champion-naah pawh Samthang tlangval a che ṭha hle. Lammuala Mizoram hnehtu Meghalaya lakah PC-a hian hattrick a siam a, Services hian 5-0 in an sawp. Hei bakah hian first match-a Goa nen 1-1 a an inhnehtawk ṭum leh semifinal-a Karnataka penalty a an hneh ṭumin goal a khung a, hun pangngaiah 1-1 a nih avangin a goal khung hi a pawimawh hle.

Samthang tlangval hian tun inelnaah goal nga a khung a, goal ruk khungtu Ayush Adhikari (Delhi) leh Arif Shaikh (Maharashtra) te chiah a tluk lo. Final-a Punjab an hneh ṭum pawh hian PC-a hian minute 61-naa Bikash Thapa goal khung tur a siamsak a, champion team Services tana player pawimawh ber ang hiala sawi theih a ni.

Mizo dang
Services team hi Army Red, Army Green, Air Force leh Navy te aṭanga pawh khawm a ni a, Santosh Trophy ṭan hma hian Inter Services Football Tournament neih a ni a, heta ṭang hian player an thlang ṭhin a ni.

Kumin bikah hian player thlan lailawk 40 zingah Mizo player panga PC-a, Jonathan, Zico Zoremsanga, Zothanpuia (Thangpuia) leh Roluahpuia te an tel a, final squad-ah 2014-a Mizoram champion puitu defender Thangpuia leh Hnahthial goalkeeper Puia te thlan an ni lo.

Qualifying round-ah Mizoram champion ṭuma captain Zico hi squad-ah la telh a ni a, final round-ah erawh telh a ni tawh lo thung. Bethlehem Veng tlangval Jonathan-a chuan, "Zico hi chu Air Force an ni a, qualifying round bika squad-a a awm ringawt pawh hian kaisang thei an nih avangin final round-ah hian telh a ni tawh lo. Santosh Trophy hi kaisan theihna a nih avangin player pawimawh bik tih loh chu final round atan hian an thlak danglam nual," tiin thil awm dan Vanglaini a hrilh.

Jonathan hi qualifying round-ah player pawimawh a ni a, final round match hmasa bera Goa nen an inkhelh ṭumin a ngalrek vei lam a tih nat avangin a khel chhunzawm tawh lo thung.

An kaisang
Services hian Santosh Trophy inelna hnuhnung pariatah vawi li an champion a, nomawi an chawi chhan pakhat nia lang chu champion team player-te hi an kaisan ṭhin avangin team dang aiin champion duhin an tuihal zawk tiin a sawi theih.

Services player tam zawk hi sipaia an rank chu sepoy an ni a, an champion chiah hian havildar-ah an kaisang. Chuvangin tun ṭuma Mizo player PC-a leh Jona te pawh hian rank pahnih Lance Naik leh Naik zuan khumin havildar an ni dawn tihna a ni a, an nomawi dawn avanga an hna lamah hamṭhatna an dawn avangin an champion hi an lawm lehzual ang.