Anastasia ngam loh Durtlang North

Durtlang North chuan dinhmun hnuaihnung zawka an din hnuah Anastasia Electric Veng chu 10-15, 12-15, 15-10, 15-13, 15-11 (3-2) in an hneh let. Suzuki Gixxer Pro Volleyball League khelh laiah Durtlang North hian match hnih an khelh tawhah hnehna an chang ve ve thei a ni.

Thawhṭanni zan Chawnpui Sports Centre-a inkhelah 2016 PVL champion Anastasia lamin set hmasa pahnih la mah se an ṭang tlang zo lo. Point 12 vaw chhuaktu Laldensanga chu RS Traders Player of the Night atana thlan tur khawpin khel ṭha mah se thlawptu a hmu ṭha tawk lo.

Chanmari West laka set hloh lo Durtlang North lamin inrintawkna an nei sang a, Samson Chhanchhuaha, Fabian Lallunghnema, Rahul Kataria, Zomuanpuia leh Lalbiakmuana ten thawhhona ṭha tak lantirin hnehna an chang let. Junior league lamah erawh Anastasia-in 15-9, 15-7, 11-15, 15-12, 15-11 (4-1) in Durtlang North an hneh ve thung. Vawi hnih an khelh tawhah Durtlang North senior team chak ve ve mah se junior team erawhin chak ni hmel an la hmu lo.

Anastasia hian zaninah match an nei zui dawn, season hmasa hmang ṭha tak Tuichangral nen an inhmachhawn zui ang. Match hnih aṭanga point riat hmu tawh Durtlang North erawhin hahchawlhna hun an nei rih dawn - Zirtawpni zan hian nikum semifinal-a an ngam loh Tuichangral bawk an hmachhawn dawn. Tuichangral hian tun karah match hnih khelh tur la nei tihna a ni.

Zanin Inkhel Tur

Junior Team
Anastasia Electric Veng 6:00 PM Tuichangral

Senior Team
Anastasia Electric Veng 8:00 PM Tuichangral
April 22, Thawhṭanni zan

Senior Team
Durtlang North 3 - 2 Anastasia Electric Veng
10-15, 12-15, 15-10, 15-13, 15-11 (3-2)
RS Traders Player of the Night: Laldensanga, Anastasia Electric Veng

Junior Team
Anastasia Electric Veng 4 - 1 Durtlang North
15-9, 15-7, 11-15, 15-12, 15-11 (4-1)